Երբ Սերժ Սարգսյանը շրջադարձ իրականացրեց և Հայաստանը տարավ ԵՏՄ, հանրաքվե եղա՞վ․ Գուրգեն Սիմոնյան․ ՏԵՍԱՆՅՈՒԹ

«Հայաստանը պետք է դուրս գա ՀԱՊԿ-ից, ԵՏՄ-ից և ԱՊՀ-ից»․ «Շնորհապետական» կուսակցության ղեկավար Գուրգեն Սիմոնյանը արտաքին քաղաքականության իրենց տեսլականը ներկայացնելիս հայտարարում է, որ Հայաստանը պետք է հրաժարվի քաղաքականությունից և հստակ ռազմավարական ուղղություն ընտրի դեպի Արևմուտք։

«Ես կարծում եմ, որ մենք պետք է փորձենք ռազմավարական աստիճանի հասցնել Եվրամիության պետությունների հետ և Միացյալ Նահանգների հետ մեր հարաբերությունները: Թուրքիայի հետ աշխատելու ենք, որ բարիդրացիական հարաբերություններ ձևավորվեն, բայց ականջալուր և նախանձախնդիր կերպով հետևելու ենք, որպեսզի Հայոց ցեղասպանության միջազգայնորեն ճանաչման հարցը առաջ տանենք, և դա հնարավոր է, ես հավատում եմ դրան: Իսկ Ադրբեջանի հետ պետք է փորձենք հավասարակշռված խաղաղության հասնել, որ Հայաստանի Հանրապետության ռազմաքաղաքական շահերը նույնպես նկատի ունենան»,- ասաց Սիմոնյանը։

Նա քննադատեց նաև գործող իշխանությունների եվրոպական քաղաքականությունը՝ հայտարարելով, որ վիզաների ազատականացման մասին միայն խոսվում է, բայց իրական քայլեր չեն արվում։ Նրա խոսքով՝ քանի դեռ Հայաստանը շարունակում է մնալ ԵՏՄ-ում և ՀԱՊԿ-ում, Եվրոպան չի դիտարկի Հայաստանին որպես լիարժեք վստահելի գործընկեր Շենգենյան գոտու ազատ մուտքի հարցում։

Սիմոնյանը դեմ է ԵՏՄ-ից դուրս գալու հարցով հանրաքվե անցկացնելու գաղափարին՝ հիշեցնելով, որ Հայաստանի՝ ԵՏՄ մտնելու որոշումն էլ ընդունվել է առանց հանրային քննարկման։

«Սերժ Սարգսյանը մի գիշերվա ընթացքում շրջադարձ իրականացրեց և Հայաստանը տարավ դեպի ԵՏՄ: Այն ժամանակ հանրաքվե եղա՞վ: Հիմա էլ դրա կարիքը չկա»,- նշեց Սիմոնյանը։

Մանրամասները՝ տեսանյութում։