Ունենք որոշակի տարածքների խնդիր, բայց դրանք դե յուրե լուծված են, դե ֆակտո լուծումը ժամանակի հարց է. Փաշինյանը՝ Սյունիքում. ՏԵՍԱՆՅՈՒԹ

«Դատիր ինձ, Տե՛ր, քանզի անբասիր ընթացա». Սյունիքի մարզ իր այցի ավարտին՝ Կապանի հրապարակում, վարչապետ Նիկոլ Փաշինյանն իր ամփոփիչ ելույթը սկսեց այս՝ Սաղմոս 25-ով՝ հայտարարելով.

«Այսուհետ քարոզարշավային բոլոր հանդիպումները սկսելու եմ սաղմոսով։ Ընտրական գործընթացը ժողովրդի և Աստծո դատն է, որտեղ քաղաքացին պետք է տա իր գնահատականը կառավարության անցած ուղուն, ձախողումներին ու հաջողություններին»։

Նիկոլ Փաշինյանն անդրադարձավ «Զանգեզուրի պղնձամոլիբդենային կոմբինատի» (ԶՊՄԿ) գործունեությանը՝ նշելով, որ 2018-2025 թթ. ընթացքում կոմբինատը պետական բյուջե է վճարել 300 միլիարդ դրամով ավելի հարկ, քան նախորդող նույն ժամանակահատվածում (2010-2017 թթ.)։ Նա շեշտեց, որ ՀՀ կառավարությունն այսօր ունի ԶՊՄԿ-ի 21,8% փայաբաժինը։

Վարչապետի պնդմամբ՝ 2018 թվականից ի վեր Հայաստանի պետական բյուջե է մտել լրացուցիչ 6,6 միլիարդ դոլար, որը, ըստ նրա, նախկինում հոսում էր մասնավոր գրպաններ։

«6.6 մլրդ դրամի 90 %-ը գնում էր ձեզ հայտնի մարդկանց գրպանները. մենք դրանք հանեցինք և ուղղորդեցինք ձեր գրպաններ»,- հայտարարեց նա։

Որպես բյուջետային մուտքերի ավելացման արդյունք՝ Փաշինյանը մատնանշեց կենսաթոշակների հնգակի բարձրացումը։ Նա փաստեց, որ Հայաստանի պատմության մեջ առաջին անգամ միջին կենսաթոշակը բարձր է սպառողական զամբյուղից։ Առողջապահության ոլորտում նա խոստացավ, որ ներդրվող ապահովագրական համակարգի շնորհիվ այլևս ոչ մի քաղաքացի «հիվանդանոցների դռների մոտ չի մնա»։

Անդրադառնալով Սյունիքի շուրջ առկա մտահոգություններին՝ Նիկոլ Փաշինյանը հայտարարեց. «Սյունիքի հարց ընդհանրապես գոյություն չունի։ Սյունիքը եղել է, կա ու կլինի Հայաստանի անբաժանելի մասը»։

Նա նշեց, որ 2024թ. սահմանազատման հանձնաժողովների կանոնակարգով և Ալմա-Աթայի հռչակագրի ամրագրմամբ՝ Սյունիքի անվտանգությունն արդեն դե յուրե հաստատված է, իսկ դե ֆակտո հաստատումը ժամանակի հարց է։

Ելույթի վերջում Նիկոլ Փաշինյանը կոչ արեց քաղաքացիներին տեր կանգնել իրենց պետությանն ու ապագային՝ շեշտելով, որ ամեն ինչ կախված է մեկ մարդուց, և այդ մարդը հենց քաղաքացին է։

Մանրամասները՝ տեսանյութում։