Եվս մեկ պաշտոնանկություն՝ Վեդիի աղմկահարույց գործով Փաշինյանի հայտարարությունից հետո

Արարատի մարզի դատախազ Վարդան Պողոսյանն իր դիմումի համաձայն ազատվել է աշխատանքից։ Այս մասին Factor TV-ին հայտնեցին Գլխավոր դատախազությունից։

Նշենք, որ սա հաջորդում է Վեդիում անչափահասների նկատմամբ սեռական բռնության դեպքին։ Թեև երեխաների հայրը առաջին հաղորդումը ոստիկանություն էր ներկայացրել դեռևս փետրվարին, բայց մեծ աղմուկ բարձրացավ միայն վերջերս լրագրող Սյուզի Բադոյանի ահազանգից հետո։

Երեկ էլ ՆԳՆ-ում ու Քննչական կոմիտեում են պաշտոնանկություններ եղել։

Մասնավորապես, աշխատանքից ազատվել էին Քրեական ոստիկանության գլխավոր վարչության Արարատի մարզային վարչության պետ, ոստիկանության գնդապետ Սարիբեկ Ռուստամյանն ու համայնքային ոստիկանության Վեդիի բաժնի պետ, ոստիկանության փոխգնդապետ Արմեն Մկրտչյանը։ Քննչական կոմիտեից էլ Արարատի մարզային քննչական վարչության պետ Տիգրան Շոխոյանն ու Վեդիի քննչական բաժնի պետ Լեռնիկ Վարդանյանն են ազատվել աշխատանքից։

Ի դեպ, այս պաշտոնանկությունները տեղի են ունեցել Նիկոլ Փաշինյանի երեկվա հայտարարությունից հետո։ Նա, անդրադառնալով Վեդիում քույրերի նկատմամբ սեքսուալ բնույթի բռնի գործողությունների աղմկահարույց դեպքին, նշեց, որ դեպքը բացահայտվել է իրավապահների օպերատիվ աշխատանքի արդյունքում, իսկ անպատասխանատու իրավապահները համակարգից կհեռացվեն։

«Ես գիտեմ կոնկրետ լրագրողներ, ովքեր իրավապահ մարմիններում ունեն աղբյուրներ, որոնք աշխատանքային ինֆորմացիա են փոխանցում, դրա հետ կապված նույնիսկ քրեական գործեր կան հարուցված և անպատասխանատու իրավապահներին անպայման կգտնենք և համակարգից կհեռացնենք։ Այսինքն՝ մի մասին հեռացրել ենք արդեն»,- նշեց Փաշինյանը։

Հավելենք, որ դեպքի առթիվ նախաձեռնվել է քրեական վարույթ, մեղադրանքներ են առաջադրվել 2 անձի, որոնք կալանավորվել են։

Արփի Հակոբյան