Factor TV-ի ահազանգից հետո ԿԸՀ-ն Գյումրիի համայնքապետարանից պահանջել է հեռացնել քարոզչական տեսանյութը

Գյումրիի համայնքապետարանի պաշտոնական էջում տեսանյութ էր հրապարակվել, որում Գյումրիի քաղաքապետին փոխարինող Ավետիս Առաքելյանը ելույթ է ունենում «Ուժեղ Հայաստան» կուսակցության ցուցակի առաջին համար Նարեկ Կարապետյանի և կուսակցության այլ անդամների՝ գյումրեցիների հետ հանդիպման ժամանակ։

«Նարեկ Կարապետյանի փոխարեն այստեղ կանգնած պետք է լիներ Սամվել Կարապետյանը, իմ փոխարեն՝ Գյումրու քաղաքապետ Վարդան Ղուկասյանը։ Երկու հզոր մարդկանցից վախենում է այս իշխանությունը, վախի մթնոլորտի մեջ է այս իշխանությունը»,- ասում է Առաքելյանը։

Տեսանյութը հավանաբար նկարահանվել է մայիսի 3-ին, երբ «Ուժեղ Հայաստան»-ի անդամները Գյումրիում էին։  

Factor TV-ի ահազանգի հիման վրա ԿԸՀ-ն դիմել է Գյումրիի համայնքապետարան և զգուշացրել՝ հեռացնել տեսանյութը։

«Ընտրական օրենսգրքով չի թույլատրվում համայնքի կամ պետական էջերում քարոզչական բնույթի նյութ դնել նախընտրական քարոզչության ժամանակահատվածում»,- մեզ հետ զրույցում ասաց ԿԸՀ մամուլի խոսնակ Սեդա Ղուկասյանը՝ հավելելով, որ դրա համար նախատեսված է վարչական պատասխանատվություն։

Գյումրիի քաղաքապետարանի էջում տեսանյութն արդեն անհասանելի է։

ՀՀ ընտրական օրենսգրքի 23-րդ հոդվածը վերաբերում է վարչական ռեսուրսի օգտագործման արգելքին և նախընտրական քարոզչության սահմանափակումներին։  

• Վարչական ռեսուրսները մարդկային, ֆինանսական և նյութական այն միջոցներն են, որոնց ընտրությունների ժամանակ տիրապետում են հանրային պաշտոններ և հանրային ծառայության պաշտոններ զբաղեցնող անձինք, որը պայմանավորված է հանրային ոլորտում անձնակազմի, ֆինանսների և հատկացումների նկատմամբ նրանց վերահսկողությամբ:
• Արգելվում են նախընտրական քարոզչության կազմակերպման և իրականացման ընթացքում վարչական ռեսուրսի օգտագործումը, այդ թվում՝ ծառայողական պարտականությունների իրականացման համար տրամադրված ֆինանսական, տեղեկատվական միջոցների, տարածքների, տրանսպորտային ու կապի միջոցների, նյութական և մարդկային ռեսուրսների օգտագործումը ընտրությունների ժամանակ առավելություն ստանալու նպատակով։

Անի Թամրազյան