16.08.2026 | 23:19
Ըմբիշներ Սամվել Տերտերյանը և Յուրիկ Պետրոսյանը դուրս են եկել Մ-20 ԱԱ-ի եզրափակիչ. ՏԵՍԱՆՅՈՒԹ
ԲԸՏՄ-ում քննարկվել են վայրի կենդանիների և բույսերի շրջանառության կարգավորման, այդ թվում՝ CITES-ի պահանջներին համապատասխանեցման քայլերը
Քաղաքականություն
07.05.2026 | 22:53
Տեղի է ունեցել վայրի կենդանիների և բույսերի արտահանման, ներմուծման և պահման պայմանների օրենսդրական կարգավորման նպատակով ստեղծված միջգերատեսչական աշխատանքային խմբի անդրանիկ նիստը, որի ընթացքում քննարկվել են CITES կոնվենցիայի պահանջներին համապատասխան թույլտվությունների տրամադրման և վերահսկողության ուժեղացմանն ուղղված քայլերը, ինչպես նաև ներմուծման, արտահանման, վերաարտահանման, տնօրինման և տիրապետման կարգերի իրավական կարգավորումները, որոնք կնպաստեն մաքսանենգության կանխմանը։ Այս մասին տեղեկացնում են ԲԸՏՄ-ից։
Աշխատանքային խումբը ձևավորվել է Տեսչական մարմնի ղեկավարի 2026 թվականի ապրիլի 28-ի № 12-Լ հրամանով՝ հիմք ընդունելով նախորդիվ կայացած քննարկումների արդյունքում ձեռք բերված պայմանավորվածությունները։
Հանդիպմանը մասնակցել են Շրջակա միջավայրի նախարարի տեղակալ Արամ Մեյմարյանը, Տեսչական մարմնի ղեկավարի տեղակալ Վրեժ Գալոյանը, Վարչապետի աշխատակազմի տեսչական մարմինների աշխատանքների համակարգման գրասենյակի, Սննդամթերքի անվտանգության տեսչական մարմնի, Պետական եկամուտների կոմիտեի պատասխանատու ներկայացուցիչներ ու ոլորտի այլ մասնագետներ։
Աշխատանքային խմբի ղեկավար Հովհաննես Մարտիրոսյանը, ողջունելով անդրանիկ նիստի մասնակիցներին, ընդգծել է, որ խմբի գլխավոր նպատակն է ստեղծել այնպիսի իրավական և թվայնացված հենք, որը կերաշխավորի պահման պայմանների համապատասխանությունը միջազգային չափորոշիչներին և Կոնվենցիայի դրույթներին։
Անդրադարձ է կատարվել օրենսդրական հասկացությունների ճշգրտմանը և անազատ ու կիսաազատ պայմաններում պահվող կենդանիների համար նվազագույն չափորոշիչների սահմանմանը, ինչը հաշվառման ամբողջական համակարգի ներդրման միջոցով կապահովի կենդանիների տեղաշարժի հետագծելիությունը։
Կարևորվել է նաև սահմանային և ներքին շուկայի հսկողությունն իրականացնող առաջնային մարմինների լիազորությունների հստակեցումը՝ տեղեկատվության օպերատիվ փոխանակման թվային լուծումների կիրառմամբ։
Հանդիպման ավարտին նախանշվել են աշխատանքային խմբի հետագա քայլերը և տրվել համապատասխան հանձնարարականներ՝ առաջարկների փաթեթի մշակման վերջնաժամկետների վերաբերյալ։
