Եվրոպական անվտանգության մարտահրավերները տարածվում են ԵՄ սահմաններից այն կողմ․ Մակրոն․ ՏԵՍԱՆՅՈՒԹ

«Մենք հնարավորություն կունենանք հանդիպումներ անցկացնելու՝ ի պաշտպանություն Հայաստանի և Մոլդովայի անկախության և ինքնիշխանության: Ավելին, կա Եվրոպա, որը ամրապնդում է իր անվտանգության և պաշտպանության կարողությունները: Ես կարծում եմ, որ սա ճիշտ հիմքն է, քանի որ եվրոպական անվտանգության մարտահրավերները տարածվում են Եվրոպական Միության սահմաններից այն կողմ, և այս առումով կարևոր է հենց այս ընդգրկուն Եվրոպան»,- այս մասին մարզահամերգային համալիրի մոտ լրագրողների հետ զրույցում նշեց Ֆրանսիայի նախագահ Էմանուել Մակրոնը։

«Մենք՝ եվրոպացիներս, կառուցում ենք անվտանգության մեր լուծումները։ Սա այն է, ինչ մենք որոշել ենք անել դեռ 2022 թվականից՝ ստեղծելով Եվրոպական քաղաքական համայնքը։

Սա այն է, ինչ մենք արել ենք՝ կառուցելով կամավորների կոալիցիա՝ Ուկրաինային անվտանգության երաշխիքներ տրամադրելու համար։ Սա այն է, ինչ մենք արել ենք հատուկ գործողության և Հորմուզի ապաշրջափակման առաքելության հետ։ Այնպես որ, սա ի պատասխան որևէ մեկի չէ, այլ եվրոպացիներն իրենց ճակատագիրն իրենց ձեռքն են վերցնում, ավելացնում են իրենց պաշտպանական և անվտանգության ծախսերը և կառուցում են իրենց ընդհանուր լուծումները»,-նշեց նա։

Խոսելով ԱՄՆ-Իրան հակամարտության մասին, Մակրոնը նշել է՝ եթե Միացյալ Նահանգները պատրաստ է վերաբացել Հորմուզը, դա շատ լավ է, դա այն է, ինչ իրենք պահանջել են ի սկզբանե։

«Բայց մենք չենք պատրաստվում մասնակցել որևէ ուժային գործողության, որն ինձ համար պարզ չի թվում։ Այսպիսով, մենք ստեղծել ենք հատուկ առաքելություն, որի վրա աշխատում ենք, ռազմական պլանավորումը կատարվել է Լոնդոնում։ Բայց մենք նախևառաջ ցանկանում ենք, որ լինի համաձայնեցված վերաբացում Իրանի և Միացյալ Նահանգների միջև։ Սա միակ լուծումն է, որը թույլ կտա կայուն կերպով վերաբացել Հորմուզի նեղուցը։ Բացի այդ, էական էր, որ հրադադարը պահպանվեր Լիբանանում։

Անցյալ գիշեր դարձյալ մի քանի տասնյակ մարդ է զոհվել։ Սա իսկապես այն պարտավորությունն է, որ կողմերը ստանձնել են, և ես դա ասում եմ Լիբանանի ինքնիշխանության, անկախության և քաղաքացիական բնակչության պաշտպանության համար»,-ասաց Ֆրանսիայի նախագահը։