30.04.2026 | 21:46
Հայտնի են ազատ ոճի ըմբշամարտի Հայաստանի երիտասարդների առաջնության հաղթողները
Cloudflare-ը ռուսական MAX մեսենջերը լրտեսական հավելված է ճանաչել
Հաղորդաշարեր
30.04.2026 | 21:13
Cloudflare խոշոր հոսթինգ մատակարարը ռուսական Max «ազգային մեսենջերը» որակել է որպես լրտեսող ծրագիր: Հայտնի չէ, թե երբ է այս պիտակը տրվել: Այնուամենայնիվ, դոմեյնը դեռևս ունի TLS վկայագիր, որը վկայում է նախագծի իսկության մասին և օգտագործվում է անվտանգ HTTPS կապերի համար: Մեսենջերը նաև դեռևս հասանելի է ներբեռնման համար App Store-ում և Google Play-ում, գրում է The Moscow times-ը:
Cloudflare-ը նախկինում Telegram-ի ոչ պաշտոնական հաղորդագրությունների հաճախորդ Telega-ն անվանել էր լրտեսող ծրագիր։ Դրանից հետո դրա TLS վկայականը չեղյալ է հայտարարվել, և App Store-ը հեռացրել է հավելվածն իր կատալոգից։ Նախագծի ներկայացուցիչները միջադեպը վերագրել էին դասակարգման սխալին։
Տարբեր փորձագետներ ևս նախկինում Max-ն անվանել են լրտեսող ծրագիր։ Ինտերնետային պաշտպանության ընկերության ղեկավար Միխայիլ Կլիմարյովը նշել է, որ գաղտնիության քաղաքականությունը հստակորեն սահմանում է, որ տվյալները կփոխանցվեն ԱԴԾ-ին, Ներքին գործերի նախարարությանը, Դաշնային հարկային ծառայությանը և Ռուսաստանի բանկին՝ ըստ պահանջի։ GitHub-ի հետազոտողները, հավելվածի APK ֆայլը վերլուծելուց հետո, պարզել են, որ այն վերահսկում է սարքի գործընթացները, հավաքում է աշխարհագրական դիրքի տվյալներ, տեղադրված ծրագրերի ամբողջական ցանկ և նույնիսկ կարող է ձայնագրել աուդիո, տեսանյութ և մուտքային տեքստը։
2025 թվականի հունիսին Վլադիմիր Պուտինն ազգային մեսենջեր ստեղծելու մասին օրենք ստորագրեց։ Դրանից հետո Ռուսաստանի իշխանությունները սկսեցին օգտագործել վարչական ռեսուրսները՝ VK-ի կողմից մշակված Max-ը գովազդելու համար։ Դպրոցական և տնային չաթերը, ինչպես նաև պաշտոնյաների և պետական ընկերությունների աշխատակիցների միջև նամակագրությունը տեղափոխվեցին պետական մեսենջեր, այն նաև ինտեգրվեց «Госуслуги» ծառայության հետ։ Միևնույն ժամանակ, «Ռոսկոմնադզոր»-ն արգելափակեց Ռուսաստանում ամենահայտնի մեսենջերներից երկուսը՝ WhatsApp-ը և Telegram-ը։
Ինքը՝ Պուտինը, Max-ի ի հայտ գալն անվանել է «լիակատար թվային ինքնիշխանության» նվաճում: Հետաքննող լրագրող Անդրեյ Զախարովը, սակայն, VK հոլդինգային ընկերության հաշվետվություններն ուսումնասիրելուց հետո պարզել է, որ Պուտինը կարող է բաժնեմաս ունենալ պետական հաղորդագրությունների հավելվածում իր զարմիկ Միխայիլ Շելոմովի միջոցով։ Պուտինի ընկերների, այդ թվում՝ Յուրի Կովալչուկի հետ կապված ընկերությունները կվաստակեն հաղորդագրությունների հավելվածից: Արդյունքում, ըստ Զախարովի, հայտարարված ինքնիշխանությունը դառնում է հարստացման և վերահսկողության գործիք՝ օգտատերերին վերածելով «թվային ճորտերի»:
Թարգմանությունը՝ Էմմա Չոբանյանի
