«Չկա Հայաստան առանց Փաշինյան»․ ով է աղմուկ հանած պաստառի հեղինակը

«Չկա Հայաստան առանց Փաշինյան» գրությամբ պաստառի լուսանկարներ են տարածվում ֆեյսբուքում։ Դրա վրա Փաշինյանն է, ՔՊ-ի կողմից որպես քարոզարշավային տարր օգտագործվող սրտիկի պատկերը և Հայաստանի Հանրապետության քարտեզը։

Ընտրություններին մասնակցող ընդդիմադիրները քննադատում են իշխանությանը «Չկա Հայաստան առանց Փաշինյան» գրության համար։

«Անթույլատրելի է պետության գոյությունը պայմանավորել անձով… Իշխանության բանաձևով՝ Հայաստանը վերջանալու է Փաշինյանով»,- այսպիսի կարծիք է հայտնել «Ուժեղ Հայաստան» դաշինքի պատգամավորի թեկնածու Գոհար Մելոյանը։

««Չկա Հայաստան առանց Փաշինյան»… Լո՞ւրջ։ Սա այն նույն ձեռագիրն է, որով կառուցվել են պատմության բոլոր բռնապետությունները՝ Ստալինից մինչև Հյուսիսային Կորեա։ Երբ պետությունը նույնացվում է մեկ մարդու հետ, դա նշանակում է միայն մեկ բան՝ դուք, որպես քաղաքացի, այլևս գոյություն չունեք»,- գրել է ՀՀ ԱԺ «Հայաստան» խմբակցության պատգամավոր Քրիստինե Վարդանյանը։

Factor.am-ը պարզեց, որ «Չկա Հայաստան առանց Փաշինյան» գրությամբ պաստառը տարածվել է Գյումրիի ավագանու ՔՊ խմբակցության ղեկավար Սարիկ Մինասյանի տեսանյութից։ Մինասյանն այդ տեսանյութը հրապարակել է ապրիլի 25-ին։ Նա այլ քաղաքացիների հետ նշում էր «Քաղաքացու օրը» և մասնակցում «խորոված փարթիին»։

Factor.am-ը Սարիկ Մինասյանից հետաքրքրվեց՝ արդյո՞ք այդ պաստառն իր կամ ՔՊ-ի կողմից է պատրաստվել։

«Քաղաքացին ինքնակամ սարքել է, երկու ամիս է կա, նո՞ր են տեսնում։ Իր սրտի ցանկությունն է, իր մտածելակերպն է»,- ասաց Սարիկ Մինասյանը՝ նշելով, որ պաստառը Ոսկեհասկ գյուղում է։

Ըստ նրա՝ գյուղի բնակիչներից մեկը, որը Ռուսաստանում է բնակվում, որոշել է վերադառնալ ծննդավայր, տուն կառուցել և բնակություն հաստատել Հայաստանում։ Այդ պատճառով էլ պաստառի վրա նաև «վերադարձ Հայաստան» գրությունը կա։

«Իր հայրենի գյուղում է, որտեղ պետք է ապրի Ռուսաստանից վերադառնալուց հետո։ Այդ պաստառի հեղինակն ինքն է, որը փակցված է շինարարների տնակի պատի վրա։ Տուն է սարքում»,- ասաց Մինասյանը։

Հարցին՝ արդյո՞ք կիսում է քաղաքացու դիրքորոշումը, որ «Չկա Հայաստան առանց Փաշինյան», Մինասյանն ասաց․ «Բնականաբար, համաձայն չեմ, ոնց որ ասեմ՝ չկա Հայաստան առանց ինձ։ Հայաստանը միշտ եղել է ու կլինի»։

Նարեկ Կիրակոսյան