Կոպիրկինն այցելել է ԿԸՀ․ ինչ հարցեր են քննարկվել

ՀՀ-ում ՌԴ դեսպան Սերգեյ Կոպիրկինը և դեսպանության առաջին քարտուղար Ալեքսանդր Մալիշևն ապրիլի 9-ին հյուրընալվել են ՀՀ ԿԸՀ-ում։ Հյուրերին ընդունել է ԿԸՀ նախագահ Վահագն Հովակիմյանը, հայտնում են հանձնաժողովի մամուլի ծառայությունից։

«Դեսպանը հետաքրքրվել է առաջիկա համապետական ընտրությունների նախապատրաստական ընթացքից»,- ասված է հաղորդագրության մեջ՝ առանց այլ մանրամասների։

Նշենք, որ ապրիլի 1-ին ՀՀ վարչապետ Նիկոլ Փաշինյանի հետ հանդիպման ժամանակ ՌԴ նախագահ Վլադիմիր Պուտինն էր հետաքրքրվել ընտրական գործընթացներից։

«Մենք շատ կցանկանայինք, որ այս բոլոր քաղաքական կուսակցությունները, քաղաքական գործիչները կարողանային մասնակցել այս ներքաղաքական աշխատանքին՝ ընտրությունների ընթացքում։ Ոմանք, գիտեմ, գտնվում են ազատազրկման վայրերում, չնայած այն հանգամանքին, որ ունեն Ռուսաստանի անձնագիր։ Դա Ձեր որոշումն է, մենք չենք միջամտում, բայց կցանկանայինք, որ նրանք, առնվազն, կարողանային մասնակցել այս ներքաղաքական գործընթացին»,- ասել էր Պուտինը, փաստացի, ակնարկելով ռուսաստանցի միլիարդատեր Սամվել Կարապետյանին։

Ի պատասխան Նիկոլ Փաշինյանն արձագանքել էր․ «Ռուսական անձնագիր ունեցող անձինք, Հայաստանի Հանրապետության Սահմանադրության համաձայն, չեն կարող լինել ո՛չ պատգամավորի թեկնածու, ո՛չ վարչապետի թեկնածու։ Այստեղ որևէ սահմանափակում չկա»։

Factor TV-ն Կենտրոնական ընտրական հանձնաժողովից փորձեց պարզել՝ դեսպանը Պուտինին հուզող հարցերը փորձե՞լ է բարձրացնել նաև Վահագն Հովակիմյանի հետ հանիպմանը, ինչին ի պատասխան հանձնաժողովից հայտնեցին․ «ԿԸՀ-ն ապաքաղաքական կառույց է, հետևաբար թե՛ ԿԸՀ հյուրերը, թե՛ ԿԸՀ ներկայացուցիչները քննարկում են բացառապես ընտրական գործընթացին վերաբերելի հարցեր՝ առանց քաղաքականության վերաբերյալ քննարկումների»:

Եվգենյա Համբարձումյան