Սիմոնյանն իր էջում տեղադրել է Factor TV-ի տեսանյութի մոնտաժված տարբերակը, որում ընտրողաբար է ներկայացված ԱԺ դիմաց հավաքվածների խոսքերը

Ազգային ժողովի դիմաց այսօրվա ակցիայի ժամանակ Factor TV-ի նկարահանած տեսանյութը և կարճ հարցումներն ԱԺ նախագահ Ալեն Սիմոնյանի  ֆեյսբուքյան էջում  ներկայացված են հատվածական։ Մոնտաժված տեսանյութում  թողնված է միայն այն քաղաքացիների խոսքերը, որոնք հրաժարվել են պատասխանել հարցերին կամ ասել են, թե չեն մասնակցում ակցիային։

Տեսանյութի ամբողջական տարբերակում երևում է, որ Factor TV-ի լրագրող Նարեկ Կիրակոսյանի հարցերին պատասխանելիս հավաքվածներից մի քանիսը, այնուամենայնիվ, պատասխանում են ակցիայի մասին հարցերին, ներկայացնում են իրենց պահանջները։
Սակայն նրանց մասնակցությամբ հատվածները կտրվել-հանվել են Ալեն Սիմոնյանի հրապարակած տարբերակից։

Փաստերի այսպիսի ներկայացումն ընդունված է անվանել Cherry picking, երբ ընտրվում ու ներկայացվում են միայն այն փաստարկները, պնդումները, որոնք ձեռնտու և շահավետ են մի կողմին, այս դեպքում՝ Ալեն Սիմոնյանին։ ԱԺ նախագահից բացի, տեսանյութի կտրված-մոնտաժված տարբերակ է հրապարակել նաև ՔՊ պատգամավոր Արուսյակ Ջուլհակյանը, իսկ ՔՊ պատգամավոր Արթուր Հովհաննիսյանը հատվածաբար է ներկայացրել ուղիղ հեռարձակումը։
ՔՊ ներկայացուցիչներն այս հրապարակումները կատարել են առանց հղման և Factor TV-ի խմբագրության համաձայնության։ Այսպիսի վարքը վտանգում է Factor TV-ի` որպես անաչառ և կարծիքները բազմակողմանի ներկայացնող լրատվամիջոցի հեղինակությունը։

Factor TV-ն քաղաքական բոլոր դերակատարներին հորդորում է լրատվամիջոցի հեղինակային տեսանյութերը չօգտագործել առանց լրատվամիջոցի համաձայնության և խուսափել լրատվական բովանդակությունն ընտրողաբար ու աղճատված ներկայացնելուց։
Ստորև տեղադրում ենք նաև տեսանյութի չմոնտաժված տարբերակը, որում կարելի է ծանոթանալ հարցմանը մասնակցած բոլոր անձանց պատասխաններին։

Գարիկ Հարությունյան

Լրացում․ Հրապարակումից հետո մեզ հետ կապ է հաստատել Ալեն Սիմոնյանը՝  հավաստիացնելով, որ  տեսանյութը  վերցվել է համացանցից, որը տեղադրված է եղել բաց հասանելիությամբ։ Նա նշել է, որ իր կողմից համացանցում հրապարակված տեսանյութից ոչինչ չի ավելացվել կամ պակասեցվել։  Պարոն Սիմոնյանի  հավաստիացումը  հիմք ընդունելով՝ մենք նաեւ խմբագրել ենք հրապարակման վերնագիրը․ «Սիմոնյանը տեղադրել է  Factor TV-ի տեսանյութի  մոնտաժած տարբերակ եւ ընտրողաբար է ներկայացրել ԱԺ դիմաց հավաքվածների խոսքերը» նախկին վերնագրի փոխարեն   նոր վերնագրում ասված է, «Սիմոնյանն իր էջում տեղադրել է Factor TV-ի տեսանյութի մոնտաժված տարբերակ, որում ընտրողաբար է ներկայացված ԱԺ դիմաց հավաքվածների խոսքերը»։

Հուսով ենք, որ  այսուհետ   հատկապես պետական բարձրաստիճան պաշտոնյաներն իրենց հրապարակումները կատարելիս նախ՝ կհարգեն  լրատվամիջոցների  հեղինակային իրավունքները, ապա եւ՝ ավելի ուշադիր  կլինեն  իրենց կողմից հրապարակվող  բովանդակության հարցում։