11.06.2026 | 13:44
Փաշինյանը` «եթե ՔՊ-ն սահմանադրական մեծամասնություն չլինի, պատերազմ կլինի» արտահայտության մասին․ ՏԵՍԱՆՅՈՒԹ
ԱՄՆ-ի և Իսրայելի ավիահարվածներից Իրանում առնվազն 25 մարդ է զոհվել. Իսրայելում ևս զոհեր կան
Քաղաքականություն
06.04.2026 | 13:33
Ավելի քան 25 մարդ, այդ թվում՝ առնվազն վեց երեխա, զոհվել է Իսրայելի և Միացյալ Նահանգների կողմից Իրանում երկուշաբթի գիշերը իրականացված հարձակումների հետևանքով, գրում է France 24-ը ։
Ավիահարվածներից մեկը թիրախավորել է Թեհրանի Շարիֆի տեխնոլոգիական համալսարանը, որտեղ ըստ իրանական լրատվամիջոցների, վնաս է հասցվել բնական գազի բաշխման կայանին։ Տարիներ շարունակ մի շարք երկրներ պատժամիջոցներ են կիրառել համալսարանի նկատմամբ, քանի որ այն աշխատել է զինվորականների հետ՝ զբաղվելով Իրանի բալիստիկ հրթիռների ծրագրով:
Թեհրանից հարավ-արևմուտք գտնվող Էսլամշար քաղաքի մոտակայքում հարվածի հետևանքով զոհվել է առնվազն 13 մարդ, հաղորդում է Fars լրատվական գործակալությունը: Եվս հինգ մարդ զոհվել է Ղոմ քաղաքի բնակելի թաղամասին հարվածի հետևանքով, ևս վեցը՝ այլ քաղաքներում, հաղորդում է պետական «Իրան» օրաթերթը:
Եվս երեք մարդ զոհվել է Թեհրանում տներից մեկին հասցված ավիահարվածի հետևանքով, հաղորդում է Իրանի պետական հեռուստատեսությունը: France 24-ի իրանցի թղթակիցը հայտնել է, որ զոհվածների թվում 10 տարեկանից փոքր 6 երեխա կա։
Իսկ Իսրայելում իրանական բալիստիկ հրթիռը հարվածել է Հայֆա նավահանգստային քաղաքի բնակելի շենքին, շենքի մի մասը փլուզվել է։ Փրկարարական խմբերը աշխատել են ամբողջ գիշեր, և ապրիլի 6-ի վաղ առավոտյան հաստատել են երկու մարդու մահը, ևս երկուսը անհետ կորած է համարվում։
Ապրիլի 6-ի վաղ առավոտյան տագնապի ազդանշաններ են հնչել ամբողջ կենտրոնական Իսրայելում։ Ապրիլի 5-ին Իրանը չորս հրթիռային արձակում է իրականացրել Իսրայելի ուղղությամբ։ Հրթիռներից մեկը հարվածել է երկրի հարավում գտնվող Բեեր Շեբայի մոտ գտնվող խոշոր արդյունաբերական և քիմիական համալիրին։
Թարգմանությունը`Էմմա Չոբանյանի
