Մակրոնը հայտարարել է, որ Եվրոպայի դաշնակիցները պետք է միավորվեն ԱՄՆ-ի և Չինաստանի դեմ

Ֆրանսիայի նախագահ Էմանուել Մակրոնը կոչ է  արել երկրորդ էշելոնի երկրներին միավորվել ԱՄՆ-ի և Չինաստանի գերիշխանության դեմ: Նա այս կոչը հնչեցրել է ասիական շրջագայության ժամանակ, որը ներառում էր այցելություններ Հարավային Կորեա և Ճապոնիա, հաղորդում է Bloomberg-ը:

Այցի հիմնական պատճառներից մեկը Հորմուզի նեղուցում ծովային անվտանգության հարցն էր, քանի որ Իրանի հետ պատերազմի հետևանքով այն փակվել է առևտրային նավագնացության համար՝ խաթարելով նավթի և հեղուկ բնական գազի համաշխարհային մատակարարումների զգալի մասը։ Սեուլից և Տոկիոյից բացի, Մակրոնը որպես պոտենցիալ դաշնակիցներ անվանել է Ավստրալիան, Բրազիլիան, Կանադան և Հնդկաստանը: Նա նշել է, որ այս կոալիցիան կարող է համատեղ աշխատել արհեստական ​​​​բանականության, տիեզերքի, էներգետիկայի, միջուկային էներգիայի և պաշտպանության ոլորտներում, գրում է The Insideer-ը:

«Մեր նպատակը երկու գերիշխող տերությունների վասալները լինելը չէ»,- հայտարարել է  Մակրոնը Սեուլում ուսանողների առջև ունեցած ելույթում։ Նա նշում է, որ Ֆրանսիան չի ցանկանում կախված լինել Չինաստանից և մտադիր չէ հաշտվել Միացյալ Նահանգների «անկանխատեսելիության» հետ։ Նա հավելել է, որ եվրոպական երկրները Ճապոնիայի և Հարավային Կորեայի հետ ընդհանուր օրակարգ ունեն միջազգային իրավունքի, ժողովրդավարության, կլիմայի և համաշխարհային առողջապահության հարցերում։

Միևնույն ժամանակ, Թրամփը վերջերս քննադատել էր  Ֆրանսիային՝ ամերիկյան ռազմական ինքնաթիռների համար օդային տարածք տրամադրելուց հրաժարվելու համար՝ երկիրն անվանելով «շատ անօգուտ» և սոցիալական ցանցերում գրել, որ «ԱՄՆ-ն կհիշի»։ Մակրոնը բազմիցս պատասխանել է, որ Ֆրանսիայի հետ պատերազմի մասին խորհրդակցություն չի եղել և հակամարտության կողմ չէ։ Ամերիկացի առաջնորդը նաև քննադատել է Հարավային Կորեային՝ մեղադրելով նրան իրանական հակամարտությունում անբավարար օգնություն ցուցաբերելու մեջ։ Ֆրանսիան, ըստ Մակրոնի, պաշտպանում է «Իրանի հետ հակամարտությունների լուծման մեխանիզմը» և առաջարկում է ուղեկցել Հորմուզի նեղուցում գտնվող նավերին ռմբակոծությունների դադարեցումից հետո։

Եվրոպացի դաշնակիցների և Վաշինգտոնի միջև հարաբերությունները շարունակում են վատթարանալ Իրանի պատերազմի ֆոնին։ Ավելի վաղ Թրամփը հայտարարել էր Իսպանիայի հետ առևտրային հարաբերությունների լիակատար խզման մասին և հանձնարարել էր ֆինանսների նախարար Սքոթ Բեսենթին դադարեցնել Մադրիդի հետ բոլոր գործնական կապերը՝ ի պատասխան Իսպանիայի կառավարության կողմից ռազմական բազաների տրամադրման մերժման։

Թարգմանությունը՝ Էմմա Չոբանյանի