Իրանի նախկին ԱԳ նախարար Զարիֆը կոչ է անում ԱՄՆ-ի հետ «համապարփակ խաղաղության համաձայնագիր» կնքել

Իրանի նախկին արտգործնախարար Մոհամմադ Ջավադ Զարիֆը կոչ է արել ԱՄՆ-ի հետ «համապարփակ խաղաղության համաձայնագիր» կնքել, գրում է DPA-ն։

Foreign Affairs ամսագրի համար հրապարակված հոդվածում Զարիֆը  պնդել է, որ հակամարտությունը պետք է լուծվի՝ համապարփակ խաղաղության համաձայնագիր ապահովելու, այլ ոչ թե հնարավոր փխրուն հրադադարի համար։ Նա գրել է, որ երկու պետություններն էլ պետք է «օգտագործեն այս աղետը որպես հնարավորություն՝ վերջ դնելու 47 տարվա թշնամանքին»։

ԱՄՆ-ն Իսրայելի հետ միասին փետրվարի 28-ին հարձակվեց Իրանի վրա։ Այդ ժամանակից ի վեր սպանվել են Իրանի տասնյակ առաջատար ռազմական և քաղաքական գործիչներ, այդ թվում՝ նախկին գերագույն առաջնորդ այաթոլլահ Ալի Խամենեին։

Իրանը պատասխանեց հրթիռային հարվածներով Իսրայելին և Պարսից ծոցի արաբական պետություններին։ Հորմուզի նեղուցում իրանական ուժերը գործնականում կաթվածահար են արել նավագնացությունը հարձակումների և սպառնալիքների միջոցով, ինչը հանգեցրել է նավթի գների կտրուկ աճի։ Պատերազմի արագ ավարտը տեսանելի չէ։

«Երկարատև թշնամանքը կհանգեցնի թանկարժեք կյանքերի և անփոխարինելի ռեսուրսների ավելի մեծ կորստի՝ առանց իրականում փոխելու առկա փակուղային վիճակը»,- նշում է Զարիֆը, որը 2013-ից 2021 թվականներին զբաղեցրել է Իրանի արտաքին գործերի նախարարի պաշտոնը։

Նա ասում է, որ պատերազմը ցույց տվեց, որ Իրանի հրթիռային և միջուկային ծրագրերը չեն կարող կասեցվել ռազմական միջոցներով։ Նրա կարծիքով՝ Թեհրանը, ինչպես անցյալում, պետք է առաջարկի կրճատել իր միջուկային ծրագիրը և բացել Հորմուզի նեղուցը։ Դրա դիմաց ԱՄՆ-ն ստիպված կլինի վերացնել միջազգային պատժամիջոցները։

Զարիֆն ընդգծում է, որ  տնտեսական համագործակցությունը նույնպես հնարավոր է և օգտակար կլինի երկու երկրների համար։

«Այս պատերազմը,- եզրակացնում է նա,- որքան էլ սարսափելի լինի, բացեց դուռը կայուն կարգավորման համար։ Իրանցիները կարող են վրդովված լինել, բայց նրանք կարող են առաջ շարժվել՝ գիտակցելով, որ իրենք ամուր կանգնած են երկու միջուկային տերությունների կողմից իրականացվող զանգվածային և անօրինական ռազմական հարձակման առջև»։

Թարգմանությունը` Էմմա Չոբանյանի