Մոլդովայի խորհրդարանը հաստատել է ԱՊՀ-ից դուրս գալու օրենքները

Մոլդովայի խորհրդարանը երկրորդ և վերջնական ընթերցմամբ ընդունել է ԱՊՀ ստեղծման համաձայնագիրը և Համագործակցության կանոնադրությունը չեղյալ հայտարարող օրինագծերը, գրում է Current time-ը։

Այս որոշումները պաշտպանել են իշխող «Գործողություն և համերաշխություն» կուսակցության, «Ժողովրդավարությունը տանը» կուսակցության 60 օրենսդիրներ և նախկին վարչապետ Իոն Կիկուն («Այլընտրանք» խմբակցությունից)։

Խորհրդարանը 101 պատգամավոր ունի։ Կոմունիստական ​​կուսակցության և Սոցիալիստական ​​կուսակցության պատգամավորները դեմ են քվեարկել համաձայնագրերի չեղարկմանը։ Նրանք հայտարարել են, որ «Մոլդովայի դուրս գալը ԱՊՀ-ից աղետալի հետևանքներ կունենա» երկրի տնտեսության համար։

Համաձայնագրերի չեղարկումը նախաձեռնել է ԱԳՆ-ն, որը կարծում է, որ ԱՊՀ-ի հիմնարար արժեքներն ու սկզբունքները ներկայումս չեն հարգվում Համագործակցության որոշ անդամների կողմից: «Ավելին, ԱՊՀ-ի համաձայնագրի չեղարկումը բնական և անխուսափելի քայլ է Եվրամիությանը միանալու նպատակին հասնելու ուղղությամբ», – նշվում է նախարարության բացատրական գրառման մեջ։

Մինչ օրս Մոլդովան չեղարկել է ԱՊՀ-ի շրջանակներում կնքված 283 համաձայնագրերից 71-ը, և մոտ 60-ը՝ դիտարկման փուլում է։

Մոլդովայի նախագահի կողմից խորհրդարանի կողմից հաստատված նախագծերը ստորագրելուց հետո, ԱԳՆ-ն դրանք կուղարկի ԱՊՀ գործադիր կոմիտե, իսկ Վիեննայի կոնվենցիային համապատասխան Համագործակցությունից դուրս գալը կավարտվի 12 ամիս անց։

Մոլդովան դադարեցրել է մասնակցությունը ԱՊՀ բոլոր միջոցառումներին սկսած 2023 թվականից, հաղորդում է Reuters-ը։

Փոխվարչապետ Միխայ Պոպշոյը  հայտարարել էր, որ Մոլդովայի կողմից Անկախ Պետությունների Համագործակցության  անդամակցության համաձայնագրերի դադարեցումը «կարևոր քայլ է երկրի եվրոպական կողմնորոշումը ամրապնդելու գործում»։ Պոպշոյը նաև նշել է, որ քաղաքացիների համար օգտակար մի շարք ԱՊՀ համաձայնագրեր կմնան ուժի մեջ։

Մոլդովայի նախագահ Մայա Սանդուն, որը կողմ է տասնամյակի վերջին երկրի անդամակցությանը Եվրամիությանը, դատապարտել է Ռուսաստանի ներխուժումը Ուկրաինա և մեղադրել Կրեմլին ներկայիս արևմտամետ Մոլդովայի կառավարության գործունեությունը խաթարելու փորձերի մեջ։

Թարգմանությունը՝ Էմմա Չոբանյանի