Մակրոնը անիրատեսական է համարում Հորմուզի նեղուցի ազատագրման ռազմական գործողությունը

Ֆրանսիայի նախագահ Էմանուել Մակրոնը Հարավային Կորեա կատարած այցի ժամանակ խիստ քննադատության է ենթարկել ԱՄՆ-ի և Իսրայելի կողմից Իրանի դեմ սանձազերծված պատերազմը, գրում է France 24-ը։

Մակրոնը նշել է, որ պատերազմը չի ապահովում «միջուկային խնդրի երկարատև լուծում»՝ անդրադառնալով Թեհրանի վիճելի միջուկային ծրագրին։ Նա նաև «անիրատեսական» է որակել Հորմուզի նեղուցը «ազատագրելու» ռազմական գործողության մասին խոսակցությունները։

«Որոշ մարդիկ պաշտպանում են Հորմուզի նեղուցը ռազմական գործողության միջոցով, ուժով ազատագրելու գաղափարը՝ դիրքորոշում, որը երբեմն արտահայտում է Միացյալ Նահանգները։ Սա երբեք այն տարբերակը չի եղել, որը մենք աջակցել ենք, քանի որ այն անիրատեսական է», – լրագրողներին ասել է  Մակրոնը։

«Դա կտևի հավերժություն և բոլոր նրանց, ովքեր անցնում են նեղուցով, կենթարկի հեղափոխության պահապանների, ինչպես նաև բալիստիկ հրթիռների ռիսկերի»,- հավելել է նա։

Անդրադառնալով Թրամփի սպառնալիքներին, թե ԱՄՆ-ն դուրս կգա ՆԱՏՕ-ից՝ Մակրոնն ասում է, որ ԱՄՆ նախագահը խաթարում է դաշինքը՝ կասկածներ սերմանելով ԱՄՆ հանձնառության վերաբերյալ։

Իրանի արտաքին գործերի նախարարության խոսնակը հայտարարել է, որ  թույլ են տալիս նավերին անցնել Հորմուզի նեղուցով՝ նավթի փոխադրման հիմնական երթուղով, քանի դեռ դրանք «չեն պատկանում ագրեսորին և չեն կապված նրա հետ»։ Newzroom Afrika հեռուստաալիքին տված հարցազրույցում Էսմայիլ Բաղային ասել է, որ նավերին թույլատրվելու է անցնել նեղուցով՝ «մեր իշխանությունների հետ անհրաժեշտ համակարգումից հետո»։

Անդրադառնալով ավելի լայն հակամարտությանը՝ Բաղային ասել է, որ Իրանը չի հանդուրժի «պատերազմի, բանակցությունների, հրադադարի արատավոր շրջան»։ Հունիսին Իրանի և Իսրայելի միջև 12-օրյա պատերազմում ԱՄՆ-ն հարձակվեց Իրանի մի քանի միջուկային և ռազմական օբյեկտների վրա։

«Նրանք ասացին, որ կանգ առնենք, մենք կանգ առանք, և ինը ամիս անց նրանք նորից սկսեցին», – հայտարարել է  Բաղային։

Թարգմանությունը՝ Էմմա Չոբանյանի