Ջենարո Գատուզո․ Այսօր ամեն բան արդար էր, սա ֆուտբոլ է

Ֆուտբոլի Իտալիայի հավաքականի գլխավոր մարզիչ Ջենարո Գատուզոն աշխարհի առաջնության եվրոպական գոտու որակավորման փլեյ-օֆֆի եզրափակիչում Բոսնիա և Հերցեգովինայի հավաքականին հետխաղային 11-մետրանոցներով պարտվելուց ու առանց ԱԱ-2026-ի ուղեգիր մնալուց հետո հայտնել է իր կարծիքը։

«Այս տղաներն արժանի չէին այս ամենին՝ չնայած բոլոր ջանքերին, խաղի հանդեպ սիրուն և նպատակասլացությանը։ Մենք երեք հնարավորություն ունեինք, իսկ նրանց եզրային փոխանցումների մեծ մասը հազիվ էր հասնում մեր դարպասին։

Շարունակում եմ հպարտանալ իմ տղաներով։ Եթե այսօր ինձ հարվածեն դաշույնով, ոչինչ չի փոխվի, քանի որ իմ ամբողջ արյունը չորացել է։ Սա կարևոր էր իտալական ֆուտբոլային շարժման համար, և շատ ծանր է նման պարտություն կրելը։

Ես չեմ ցանկանում խոսել մրցավարի կամ նմանատիպ բաների մասին, բայց այսօր ամեն բան արդար էր, սա ֆուտբոլ է։ Ես ֆուտբոլում եմ երկար տարիներ, տոնել եմ հաղթանակներ և կրել պարտություններ, ինչպես այսօր, բայց դժվար է համակերպվել դրա հետ։ Եվ հիմա մենք կրկին խոսում ենք աշխարհի առաջնությանը չմասնակցելու մասին։ Ես անձամբ ներողություն եմ խնդրում, որ չկարողացա մասնակցել, բայց այս տղաները իրենց ամբողջ ուժը տվեցին»,- Գատուզոյի խոսքը մեջբերում է Football Italia-ն։

Հիշեցնենք, որ Իտալիայի հավաքականը երրորդ անգամ անընդմեջ չի մասնակցի աշխարհի առաջնությանը։ Աշխարհի քառակի չեմպիոնը նախորդ անգամ աշխարհի առաջնությանը մասնակցել է 2014 թվականին՝ խմբային փուլում գրավելով երրորդ տեղը։ ԱԱ-2018-ում ու ԱԱ-2022-ում իտալացիներին չէր հաջողվել նվաճել եզրափակիչ փուլի ուղեգիր։