Մեծ Բրիտանիան Հորմուզի նեղուցի բացման հետ կապված հանդիպում կհյուրընկալի

Մեծ Բրիտանիան այս շաբաթ կհյուրընկալի շուրջ 35 երկրների հանդիպում՝ քննարկելու Հորմուզի նեղուցի վերաբացման ուղիները, որը Մերձավոր Արևելքի պատերազմի պատճառով կաթվածահար է եղել, հայտարարել է թագավորության վարչապետ Քիր Սթարմերը։

«Հանդիպման ժամանակ կգնահատվեն բոլոր հնարավոր դիվանագիտական ​​և քաղաքական միջոցառումները, որոնք կարող ենք ձեռնարկել նավարկության ազատությունը վերականգնելու, արգելափակված նավերի և ծովագնացների անվտանգությունը երաշխավորելու և կենսականորեն կարևոր ապրանքների տեղաշարժը վերսկսելու համար»,- լրագրողներին ասել է Սթարմերը։

Մամուլի ասուլիսից կարճ ժամանակ առաջ Դոնալդ Թրամփը հայտարարել էր, որ քննարկում է ԱՄՆ-ն ՆԱՏՕ-ից դուրս բերելու հարցը՝ դաշինքի կողմից պատերազմին չներգրավվելու վերաբերյալ բազմաթիվ քննադատություններից հետո։ Թրամփը նաև բազմիցս առանձնացրել է Մեծ Բրիտանիան և Սթարմերին։

Հարցին՝ արդյո՞ք նա ավելի սերտ կապեր է հաստատում Եվրոպայի հետ, քանի որ Թրամփի հետ իր հարաբերությունները վատթարանում են, Սթարմերը պատասխանել է, որ չի ընտրում մայրցամաքի և ԱՄՆ-ի միջև։

«Կարծում եմ՝ մեր շահերից է բխում ամուր հարաբերություններ ունենալ ԱՄՆ-ի և Եվրոպայի հետ։ Կարծում եմ, որ երբ խոսքը վերաբերում է պաշտպանությանն ու անվտանգությանը, էներգետիկ արտանետումներին և տնտեսությանը, մեզ անհրաժեշտ է ավելի ամուր հարաբերություններ Եվրոպայի հետ»,- ասել է նա։

Սթարմերը նաև նշել է, որ մայրցամաքի հետ ավելի ամուր համագործակցությունը կօգնի Միացյալ Նահանգների հետ հարաբերություններին։ Միաժամանակ, Մեծ Բրիտանիայի վարչապետն ասել է, որ իր վրա մեծ ճնշում է գործադրվել՝ փոխելու դիրքորոշումը [Իրանի] պատերազմին միանալու վերաբերյալ, բայց ինքը չի պատրաստվում փոխել դիրքորոշումը։

«Անկախ ճնշումից, անկախ աղմուկից՝ ես Մեծ Բրիտանիայի վարչապետն եմ, և ես պետք է գործեմ մեր ազգային շահերից ելնելով»,- ասել է նա։

Հիշեցնենք, որ Թրամփը երեկ Truth Social-ում իր դաշնակիցների, այդ թվում՝ Մեծ Բրիտանիայի հետ կապված գրել է. «Դուք պետք է սկսեք սովորել՝ ինչպես պայքարել ինքներդ ձեզ համար, ԱՄՆ-ն այլևս այնտեղ չի լինի ձեզ օգնելու համար»։

Թրամփը  Telegraph-ին տված հարցազրույցում ՆԱՏՕ-ն անվանել էր «թղթե վագր» և հայտարարել, որ ԱՄՆ անդամակցությունը կարող է վերանայվել Իրանի հետ պատերազմից հետո։ Հարցազրույցում Թրամփը նաև քննադատել է Սթարմերին Մեծ Բրիտանիայի կողմից պատերազմին միանալուց հրաժարվելու համար և կասկածի տակ դրել երկրի ռազմածովային կարողությունները։

Թարգմանությունը՝ Էմմա Չոբանյանի