Քաղաքականություն
15.04.2024 | 12:46
Հունվարից Ֆրեզնոյի հայկական «Արարատ» գերեզմանատունը դարձել է հրկիզողների թիրախ։ Ընդհանուր առմամբ, վեց միջադեպի հետևանքով այրվել է 19 ծառ: Ըստ Fox 26 News-ի՝ ուրբաթ գիշերը հայկական գերեզմանատունը կրկին թիրախ է դարձել, գերեզմանատան մուտքի երկայնքով այրվել են ութ ծառեր:
Նշվում է, որ դեպքի վայր են ժամանել հրշեջներ, ինչպես նաև Ֆրեզնոյի ոստիկանությունը, սակայն ձերբակալվածներ չկան:
«Սա վրդովեցուցիչ է տնօրենների խորհրդի, հայ համայնքի, անձնակազմի և անձամբ ինձ համար: Սա միակ հայկական գերեզմանոցն է Հայաստանից և Մերձավոր Արևելքից դուրս։ Մեր առաքելությունն է՝ կարեկցանքով ծառայել հայ ընտանիքներին իրենց կարիքի պահին՝ վառ պահելով նաև այստեղ թաղվածների հիշատակը: Անհնար է գերագնահատել, թե որքան տխուր է սա մեզ համար»,- ասել է հայկական գերեզմանատան գործադիր տնօրեն Շերի Մենինգ-Քարթրայթը:
Հրդեհը բռնկվել է 1885 թվականից գործող գերեզմանատան ամենահին հատվածում։ Լրատվամիջոցը նշում է, որ դեպքը մտահոգիչ է ապրիլի 24-ին կայանալիք Հայոց ցեղասպանության զոհերի հիշատակի օրվա նախաշեմին, և դա կարող է լինել ատելության հանցագործություն:
Նշենք, որ այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը։
