«Նրանք շատ են ուզում գործարք կնքել». Թրամփը հայտնել է Իրանում «ճիշտ մարդկանց» հետ բանակցություններ վարելու մասին

ԱՄՆ վարչակազմը բանակցություններ է վարում Իրանի «ճիշտ մարդկանց» հետ՝ համաձայնության հասնելու համար, որը կդադարեցնի մարտական ​​գործողությունները, հայտարարել է ԱՄՆ նախագահ Դոնալդ Թրամփը Սպիտակ տանը լրագրողների հետ զրույցում, գրում է Current time-ը։

«Մենք բանակցություններ ենք վարում ճիշտ մարդկանց հետ, և նրանք շատ են ուզում գործարք կնքել։ Նույնիսկ չեք կարող պատկերացնել, թե որքան են նրանք դա ուզում»,- վստահեցրել է Թրամփը։

Նրա խոսքով՝ Իրանը մեծ զիջում է կատարել Միացյալ Նահանգներին էներգետիկ ոլորտում։ ԱՄՆ նախագահը սա դրական զարգացում է անվանել և ակնարկել, որ զիջումը կապված է Հորմուզի նեղուցի հետ, որը Պարսից ծոցից համաշխարհային շուկա նավթի մատակարարման հիմնական ուղին է։ Իրանը փաստացիորեն փակել է նեղուցը փետրվարի վերջին ԱՄՆ-Իսրայել ռազմական գործողության մեկնարկից ի վեր։

«Նրանք մեզ նվեր արեցին, և դա շատ առատաձեռն նվեր էր, որն արժեր հսկայական գումար։ Այն կապված չէ միջուկային զենքի հետ, այն կապված է նավթի և գազի հետ, և դա շատ լավ քայլ է, որ նրանք արեցին»,- ասել է Թրամփը։

Նա, սակայն, չի մանրամասնել՝ արդյո՞ք իր դեսպաններ Սթիվ Ուիթկոֆը և Ջարեդ Քուշները ծրագրում են բանակցություններ այս շաբաթ, գրում է Reuters-ը: Գործակալության նաև հաղորդում է, որ Պակիստանը պատրաստակամություն է հայտնել հյուրընկալել ԱՄՆ-Իրան բանակցությունները։

Իսրայելական Ynet-ի տվյալներով՝ ԱՄՆ-ն ու Իրանը բանակցություններ են սկսել գաղտնի շփումներից հետո։ Իրանի էներգետիկ ենթակառուցվածքներին հարվածները դադարեցնելու և բանակցություններ սկսելու Թրամփի որոշմանը հանգեցրած շրջադարձային պահը Իրանի արտգործնախարար Աբբաս Արաղչիի և Սթիվ Ուիթկոֆի միջև հեռախոսազրույցն էր, նշում է աղբյուրը։ Միաժամանակ, Ynet-ը հայտնել է, որ պատերազմի չորրորդ օրվանից Վաշինգտոնի և Թեհրանի միջև միջնորդների միջոցով գաղտնի կապի ալիք է գործել, սակայն երկար ժամանակ անարդյունք է եղել։

Մարտի 23-ին Դոնալդ Թրամփը հայտարարել էր Թեհրանի հետ «շատ լավ և արդյունավետ» բանակցությունների մասին և հրահանգել հինգ օրով հետաձգել Իրանի էներգետիկ ենթակառուցվածքներին հարվածները։ Թեհրանը պաշտոնապես հերքում է բանակցությունների մասին տեղեկությունները։

Թարգմանությունը՝ Էմմա Չոբանյանի