24.03.2026 | 20:25
Մեղրիի լեռնանցքում թույլ ձյուն է տեղում
Սաուդյան Արաբիան և ԱՄԷ-ն աստիճանաբար ներքաշվում են Իրանի հետ պատերազմի մեջ. WSJ
Քաղաքականություն
24.03.2026 | 15:55
ԱՄՆ դաշնակիցները Պարսից ծոցում աստիճանաբար ներքաշվում են Իրանի դեմ պատերազմի մեջ՝ շարունակվող հարձակումներից հետո, որոնք լրջորեն վնասել են նրանց տնտեսություններն ու սպառնում են ապահովել Թեհրանի երկարաժամկետ վերահսկողությունը Հորմուզի նեղուցի նկատմամբ, գրում է The Wall Street Journal-ը (WSJ)՝ հղում անելով աղբյուրներին, գրում է DW-ի ռուսական ծառայությունը։
Աղբյուրների համաձայն՝ Սաուդյան Արաբիան վերջերս թույլատրել է ամերիկյան ուժերին օգտագործել Արաբական թերակղզու արևմտյան մասում գտնվող Ֆահդ թագավորի անվան ավիաբազան, չնայած ռազմական գործողությունների սկսվելուց առաջ թագավորությունը հայտարարել էր, որ թույլ չի տա իր օբյեկտները կամ օդային տարածքը օգտագործել Իրանի դեմ հարվածների համար։
Աղբյուրների փոխանցմամբ՝ թագաժառանգ Մուհամմեդ բին Սալմանն այժմ ձգտում է վերականգնել զսպման ուժը և մոտ է ռազմական գործողությունների դիմելու որոշմանը։
«Դա միայն ժամանակի հարց է»,- ասել է նրանցից մեկը։
«Սաուդյան Արաբիայի համբերությունը իրանական հարձակումների նկատմամբ անսահմանափակ չէ։ Ցանկացած համոզմունք, որ Պարսից ծոցի երկրները անկարող են արձագանքել, սխալ է»,- անցյալ շաբաթ հայտարարել էր թագավորության արտաքին գործերի նախարար Ֆեյսալ բին Ֆարհանը։
Արաբական Միացյալ Էմիրությունները (ԱՄԷ), իր հերթին, սկսել է սահմանափակել իրանական ակտիվները՝ սպառնալով կտրել Թեհրանի ղեկավարության աջակցության կենսական աղբյուրը, միաժամանակ քննարկելով հակամարտությանը ռազմական ներգրավվածության հնարավորությունը: Դուբայը փակել է Իրանական հիվանդանոցը և Իրանական ակումբը՝ հաստատություններ, որոնք, ըստ կառավարության, «օգտագործվել են ռեժիմի և ԻՀՊԿ-ի օգտին՝ խախտելով ԱՄԷ օրենսդրությունը»:
ԱՄԷ-ն, որը տարիներ շարունակ ծառայել է որպես իրանական բիզնեսի ֆինանսական կենտրոն, զգուշացրել է իրանական միլիարդավոր դոլարների ակտիվների հնարավոր սառեցման մասին․ քայլ, որը կարող է զգալիորեն սահմանափակել Թեհրանի հասանելիությունը արտարժույթին և համաշխարհային առևտրային ցանցերին։
WSJ-ի աղբյուրները նշում են, որ Իրանը ստիպում է իր հարևաններին գործել՝ հիմնականում պատերազմից հետո Հորմուզի նեղուցը վերահսկելու պահանջ ներկայացնելով։ Թեհրանը փաստացիորեն փակել է նեղուցը՝ հարձակվելով անցնող նավերի վրա, բայց թույլ տալով անցնել ընտրված նավերին։ Աղբյուրների համաձայն՝ Իրանը արաբ պաշտոնյաներին տեղեկացրել է Հորմուզի նեղուցով անցնելու համար վճար գանձելու իր մտադրության մասին, ինչպես Եգիպտոսի Սուեզի ջրանցքում։
Պարսից ծոցի առաջնորդները, հիմնականում՝ ԱՄԷ-ն և Սաուդյան Արաբիան, Թրամփի հետ պարբերաբար հեռախոսազրույցներում պնդում են, որ ԱՄՆ-ն հետևի և ոչնչացնի Իրանի ռազմական կարողությունները, նախքան առաջ շարժվելը: WSJ-ի աղբյուրների համաձայն, նրանք նաև հիասթափված են Թրամփի վարչակազմի որոշումների վրա էականորեն ազդելու իրենց անկարողությունից, չնայած իրենց անվտանգության գործընկերությանը և այդ հարաբերություններում կատարված հսկայական ներդրումներին։
Այս զարգացումները նաև համոզում են արաբական պետություններին, որ նրանք կարող են ստիպված լինել հակահարված տալ՝ զսպումը վերականգնելու համար, նշում են աղբյուրները։
Ամերիկյան անվտանգության երաշխիքների և Իրանի հետ դիվանագիտական գործակցության վրա հույսը դնելը որպես սպառնալիքներից պաշտպանություն արդյունք չի տվել։ Սա պարզ դարձավ անցյալ շաբաթ, երբ Իրանը հարձակվեց Կատարի Ռաս Լաֆանի էներգետիկ հանգույցի վրա, որը Կարմիր ծովում կարևոր էներգետիկ հանգույց է, ինչպես նաև Քուվեյթի և ԱՄԷ-ի օբյեկտների վրա։ Կատարը դատապարտեց հարձակումը՝ այն համարելով վտանգավոր սրացում և ազգային անվտանգությանը ուղղակի սպառնալիք։
Թարգմանությունը՝ Էմմա Չոբանյանի
