Լարիջանիի սպանությունը չի ապակայունացնի Իրանի քաղաքական համակարգը. Արաղչի

Իրանի Անվտանգության խորհրդի քարտուղար Ալի Լարիջանիի սպանությունը մահացու հարված չի հասցնի Իսլամական Հանրապետության ղեկավարությանը։ Al Jazeera-ին տված հարցազրույցում այս մասին հայտարարել է Իրանի արտաքին գործերի նախարար Աբբաս Արաղչին։

Նա հավելել է՝ Միացյալ Նահանգներն ու Իսրայելը դեռևս չեն գիտակցել, որ Իրանի կառավարությունը հույսը չի դնում մեկ անհատի վրա։

«Ես չգիտեմ, թե ինչու ամերիկացիներն ու իսրայելցիները դեռ չեն հասկացել այս կետը. Իրանի Իսլամական Հանրապետությունն ունի ամուր քաղաքական կառուցվածք՝ հաստատված քաղաքական, տնտեսական և սոցիալական ինստիտուտներով։ Մեկ անհատի առկայությունը կամ բացակայությունը չի ազդում այս կառուցվածքի վրա։ Իհարկե, անհատներն ազդեցիկ են, և յուրաքանչյուր մարդ խաղում է իր դերը՝ ոմանք ավելի լավ, ոմանք ավելի վատ, ոմանք ավելի քիչ, բայց կարևորն այն է, որ Իրանի քաղաքական համակարգը շատ ամուր կառուցվածք է»,- նշել է նա։

Արաղչին ընդգծել է երկրի գերագույն հոգևոր առաջնորդ այաթոլլահ Ալի Խամենեիի սպանությունը ԱՄՆ-ի և Իսրայելի հարվածների առաջին օրը՝ փետրվարի 28-ին, նշելով, որ չնայած ազգային հսկայական կորստին՝ «համակարգը շարունակեց գործել»։

«Մենք չենք ունեցել առաջնորդից ավելի կարևոր մեկին, և նույնիսկ առաջնորդը նահատակվեց, այնուամենայնիվ, համակարգը շարունակեց իր աշխատանքը և անմիջապես փոխարինող ապահովեց։ Եթե որևէ մեկը նահատակվի, նույնը կլինի։ Եթե արտաքին գործերի նախարարը երբևէ նահատակվի, ի վերջո, կգտնվի ինչ-որ մեկը, որը կզբաղեցնի այդ պաշտոնը»,- ասել է նա։

67-ամյա Ալի Լարիջանիի սպանությունը, որը սպանված գերագույն հոգևոր առաջնորդ Ալի Խամենեիի և նրա իրավահաջորդի՝ Մոջթաբա Խամենեիի վստահելի անձն էր, նշանավորում է Թեհրանի ղեկավարության ամենաբարձրաստիճան գործչի հեռացումը 19 օր առաջ պատերազմի սկսվելուց ի վեր։

Հարցազրույցում Արաղչին կրկին ասել է, որ Պարսից ծոցի տարածաշրջանում և դրանից դուրս աճող հակամարտությունը Թեհրանի ընտրությունը չէ, և ԱՄՆ-ը, ի վերջո, պետք է պատասխանատվություն կրի։

«Ես կկրկնեմ՝ այս պատերազմը մեր պատերազմը չէ։ Մենք չենք սկսել այն։ Միացյալ Նահանգներն է սկսել այն և պատասխանատու է այս պատերազմի բոլոր հետևանքների համար՝ մարդկային և ֆինանսական, թե՛ Իրանի, թե՛ տարածաշրջանի, թե՛ ամբողջ աշխարհի համար։ Միացյալ Նահանգները պետք է պատասխանատվություն կրի»,- ասել է իրանցի պաշտոնյան։

Բացի այդ, Արաղչին հայտարարել է, որ Իրանի դիրքորոշումը միջուկային զենքի մշակման դեմ էականորեն չի փոխվի՝ շեշտելով, որ նոր գերագույն առաջնորդը դեռևս հրապարակայնորեն չի արտահայտել իր տեսակետն այս հարցի վերաբերյալ։

Իրանի դեմ ԱՄՆ-ի և Իսրայելի պատերազմի սկզբում սպանված գերագույն առաջնորդ այաթոլլահ Ալի Խամենեին 2000-ականների սկզբին հրապարակված ֆեթվայում (կրոնական հրամանագիր) դեմ էր արտահայտվել զանգվածային ոչնչացման զենքի մշակմանը։ Արաղչին ասել է, որ ֆեթվաները կախված են դրանք հրապարակող իսլամական իրավաբանից՝ հավելելով, որ ինքն այն դիրքում չէ՝ դատելու Իրանի նոր գերագույն առաջնորդ Մոջթաբա Խամենեիի իրավական կամ քաղաքական հայացքները:

Թարգմանությունը՝ Էմմա Չոբանյանի