Արդի աշխարհում պետությունների հաջողությունը մեծապես կախված է փոփոխություններին արագ և արդյունավետ հարմարվելուց և նոր մոտեցումներ որդեգրելուց։
«Արմենպրես»-ի փոխանցմամբ՝ Հանրային հատվածի նորարարությունների ֆորումի ժամանակ ունեցած ելույթի ժամանակ այս մասին ասել է ՀՀ նախագահ Վահագն Խաչատուրյանը։
«Արդի աշխարհում պետությունների հաջողությունը մեծապես կախված է փոփոխություններին արագ և արդյունավետ հարմարվելուց և նոր մոտեցումներ որդեգրելուց։ Այդ իսկ պատճառով անհրաժեշտ է խրախուսել ստեղծարար մտածողությունը և նախաձեռնողականությունը հանրային կառավարման համակարգում։ Նորարարությունը պետական կառավարման մեջ նշանակում է ոչ միայն նոր տեխնոլոգիաների կիրառում, այլ նաև մտածողության փոփոխություն։ Այն ենթադրում է ավելի բաց կառավարման մշակույթ, համագործակցություն տարբեր հաստատությունների միջև և քաղաքացիների կարիքներին ավելի զգայուն լուծումներ։
Հայաստանը վերջին տարիներին հետևողականորեն շարժվում է այդ ուղղությամբ՝ իրականացնելով հանրային կառավարման կարևոր և խորքային բարեփոխումներ։ Այս փոփոխությունների նպատակն է պետական կառավարման համակարգը դարձնել ավելի արդյունավետ, ավելի թափանցիկ և ավելի հաշվետու՝ այն համապատասխանեցնելով ժողովրդավարական նորմերին և ժամանակակից տեխնոլոգիական զարգացումներին»,- ասել է նա։
ՀՀ նախագահի խոսքով՝ այս ճանապարհին առանձնահատուկ կարևոր դեր ունեն հանրային ծառայողները՝ պաշտոնյաներ, որոնք իրենց ամենօրյա աշխատանքով ստեղծում են արդյունք, առաջարկում նոր լուծումներ և նպաստում ավելի արդյունավետ պետական համակարգի ձևավորմանը։
