Պետականացումից հետո ՀՀ-ին որքա՞ն միջոցներ են անհրաժեշտ, որպեսզի խելքի բերվեն ՀԷՑ-ի էներգետիկ համակարգերը․ Ռ․ Պետրոսյանը լուսանկարներ է հրապարակել

Հայաստանի էլեկտրական ցանցերի ժամանակավոր կառավարիչ Ռոմանոս Պետրոսյանը գրառմամբ անդրադարձել է  ՀԷՑ-ում տիրող անմխիթար վիճակին ու հարց հնչեցնում, թե «պետականացումից հետո ՀՀ-ին (իմա՝ մեր ժողովրդին) որքա՞ն միջոցներ են անհրաժեշտ, որպեսզի փոքրիշատե «խելքի բերվեն» ՀԷՑ-ի այսչափ մաշված, գլխովին խաթարված ու տեխնոլոգիապես գերհնացած ենթակառուցվածքներն ու էներգետիկ համակարգերը»։

«Նկարում ՀԷՑ-ի բաշխման ցանցում վերջին տասնամյակների ընթացքում անդադար լարման տակ գտնվող տրանսֆորմատորային ենթակայաններից մեկի նկարներն են (400 կՎԱ հզորություն, 6/0,4 կՎ լարում)։

Այսպիսի էներգատեխնիկական պարամետրերով շուրջ 10.200 հատ գործող ենթակայաններ ունենք ողջ ՀՀ-ում՝ ՀԷՑ-ի բաշխման ցանցում, որից մոտ 25%-ը մայրաքաղաքի տարածքում են շահագործվում, իսկ մնացածը՝ ՀՀ մարզերում։

Վերոնշյալ ենթակայանների միայն մոտ 5%-ն է, որ վերջին 10-15 տարիների ընթացքում որևէ ծրագրով վերակառուցման է ենթարկվել, չնայած այն հանգամանքին, որ այդ ենթակայաններում մի քանի տասնամյակ շահագործվող՝ խորհրդային արտադրության տրանսֆորմատորների շահագործման առավելագույն ժամկետը 20 տարի է՝ այն էլ պատշաճ տեխնիկական սպասարկման և համապատասխան խնամքի պարագայում։

Հիմա հարց.

Անխուսափելիորեն պետականացումից հետո ՀՀ-ին (իմա՝ մեր ժողովրդին) որքա՞ն միջոցներ են անհրաժեշտ, որպեսզի փոքրիշատե «խելքի բերվի» ՀԷՑ-ի այսչափ մաշված, գլխովին խաթարված ու տեխնոլոգիապես գերհնացած ենթակառուցվածքներն ու էներգետիկ համակարգերը, որպեսզի մեր երկրում բաշխման ցանցերը կարողանան պետական, հանրային ու մասնավոր հատվածին ժամանակակից պահանջներին բավարարող որակի և ծավալի կենսական նշանակության էլեկտրաէներգիա մատակարարել, որպեսզի որևէ խոչընդոտ չառաջանա ՀՀ-ում ՏՏ ոլորտի, ժամանակակից տեխնոլոգիական արդյունաբերության կամ արհեստական բանականության ու այլ ինովատիվ ինդուստրիալ ուղղությունների զարգացման համար. 5մլրդ՞, 50մլրդ՞, 500մլրդ՞, թե՞ Տրիլիոնն անց…