Փաշինյանը պեռաշկի-կուկուռուզով հանրային անհոգության պատկեր է ստեղծում․ ո՛չ, ուրախ ավտոբուսը Հայաստանը չէ․ Լիլիթ Գալստյան․ ՏԵՍԱՆՅՈՒԹ

«Միջազգային հանրապետական ինստիտուտի (IRI) հրապարակած սոցհարցման տվյալները, որոնց համաձայն «Հայաստան» դաշինքի վարկանիշը կազմում է 4%, արժանահավատ չեն և կարող են քաղաքական ենթատեքստ ունենալ»,- Factor TV-ի եթերում պնդեց ՀՅԴ Բյուրոյի անդամ, «Հայաստան» խմբակցության պատգամավոր Լիլիթ Գալստյանը՝ միաժամանակ նշելով, որ իրենց ներքին հարցումները բոլորովին այլ պատկեր են ցույց տալիս։

«Եկեք սկսենք այնտեղից, թե որքանով են  դրանք (IRI-ի հարցման արդյունքները) արժանահավատ։ Մենք էլ ունենք մեր սոցիոլոգիական հարցումները, և բնականաբար, մեր քաղաքական ուժը և մեր դաշինքը պարբերաբար, գրեթե ամենամսյա պարբերականությամբ, հարցումներ է կատարում»։ Նրա խոսքով՝ իրենց տվյալները ցույց են տալիս, որ դաշինքի վարկանիշը «երկնիշ թվի» է մոտենում։

Գալստյանը հարցման արդյունքները կապեց նաև արտաքին քաղաքական գործոնների հետ՝ հիշեցնելով ԱՄՆ պաշտոնյայի վերջերս կատարած այցը. «Չմոռանանք, թե ովքեր են տերերը։ Այն հանրապետականը, որի փոխնախագահը, կուսակցությունը նկատի ունեմ, վերջերս Հայաստանում էր, և շատ ակնհայտորեն և շատ բացահայտորեն իր համակրանքը հայտնեց այսօրվա գործող վարչախմբի առաջնորդի նկատմամբ։ Եվ ես կարծում եմ,  շատ հարցերի պատասխաններ նաև այդտեղ կարող եք տեսնել»։

Չնայած հարցումների արդյունքների հանդեպ թերահավատությանը` Լիլիթ Գալստյանն ընդունում է, որ ընդդիմությունը չի արդարացրել հանրային սպասումները, ինչը հանգեցրել է որոշակի հիասթափության։ «Այո՛, ցավոք սրտի, մեզ չհաջողվեց իրականացնել իշխանափոխություն և կասեցնել Հայաստանի կործանման թափանիվը։ Այդ իմաստով, որոշակիորեն մենք հանրային սպասումները չարդարացրեցինք։ Ես դա ընդունում եմ, և այդտեղ չեմ կարող ուղղակի անկեղծ չլինել՝ այդ գնահատականը չտալու համար»,- ասաց նա։

Ըստ բանախոսի՝ գործող իշխանությունները երկրում ձևավորել են անհանդուրժողականության և վախի մթնոլորտ՝ քաղաքական ընդդիմախոսներին լռեցնելու համար կիրառելով ուժային կառույցները։ Չնայած հարուցված բազմաթիվ քրեական գործերին՝ Լիլիթ Գալստյանը պնդեց՝ դրանց 73%-ը կարճվում է, ինչը, ըստ նրա, վկայում է այդ գործընթացների քաղաքական բնույթի մասին։

Լիլիթ Գալստյանը գալիք ընտրությունները դիտարկում է ոչ թե որպես սովորական քաղաքական գործընթաց, այլ որպես պետականության պահպանման համար վճռորոշ, էկզիստենցիալ պայքար։ Նա կոչ է անում հասարակությանը մոտենալ այս իրողությանը «Սարդարապատի գիտակցումով»։

«Ես ուզում եմ, որ առաջիկա ընտրություններին և մյուս առաջիկա նախընտրական շրջանին մեր հասարակությունը մոտենա Սարդարապատի գիտակցումով, որովհետև իսկապես, դու ուզո՞ւմ ես հայոց պետականությունը պահել, պաշտպանել, ունենալ, թե՞ ուզում ես կորցնել այդ պետականությունը, և Հայաստանը դառնա ադրբեջանական-թուրքական ենթապետություն։ Այ այս երկու ընտրությունն ունես՝ քաղաքակրթական ընտրություն, հայ մնալու, պետականություն ունենալու, թե կորցնելու քո քաղաքակրթական ընտրությունը։ Հունիսի 7-ը հենց դրա մասին է»,- եզրափակեց Լիլիթ Գալստյանը։

Հարցազրույցն ամբողջությամբ՝ տեսանյութում։

Ռոբերտ Անանյան