25.04.2026 | 11:33
Հռոմում կայացել է Հայոց ցեղասպանության 111-րդ տարելիցին նվիրված միջոցառում
Պուտինը հանձնարարել է քննարկել Եվրոպա գազի մատակարարումը դադարեցնելու հարցը
Քաղաքականություն
05.03.2026 | 13:55
Ռուսաստանի նախագահ Վլադիմիր Պուտինը չի բացառել, որ Մոսկվայի համար ավելի ձեռնտու կլինի անմիջապես դադարեցնել Եվրոպային գազի մատակարարումը, քան սպասել, որ եվրոպական երկրները լիովին հրաժարվեն ռուսական գազից, գրում է Meduza-ն:
«Նրանք նախատեսում են մեկ ամսից ռուսական գազի, այդ թվում՝ հեղուկ գազի գնման սահմանափակումներ մտցնել, իսկ մեկ տարի անց՝ 2027 թվականին, հետագա սահմանափակումներ՝ մինչև լիակատար արգելք։ Եվ հիմա այլ շուկաներ են բացվում։ Գուցե մեզ համար ավելի ձեռնտու կլինի հենց հիմա դադարեցնե՞լ եվրոպական շուկա մատակարարումները, և անցնել բացվող շուկաներ և այնտեղ ամրապնդվել»,- ասել է Պուտինը Պավել Զարուբինին տված հարզազրույցում։
Նա նշել է, որ դրանում «քաղաքական ենթատեքստ չկա»։
«Եթե մեզ մեկ կամ երկու ամսից, այնուամենայնիվ, փակելու են, մի՞թե ավելի լավ չէ ինքներս հիմա դադարեցնենք, ու գնանք այն երկրներ, որոնք հուսալի գործընկերներ են։ Եվ այնտեղ ամրապնդվել։ Բայց դա լուծում չէ. այս դեպքում պարզապես ես եմ բարձրաձայն մտածում, այսպես ասած։ Ես կհանձնարարեմ կառավարությանն աշխատել այս հարցի շուրջ մեր ընկերությունների հետ»,- հավելել է Պուտինը։
Հունվարին ԵՄ երկրները համաձայնել են մինչև 2027 թվականը լիովին հրաժարվել ռուսական գազից։ Սլովակիան և Հունգարիան, որոնք ռուսական գազ են ստանում «Թուրքական հոսք» խողովակաշարով, քվեարկել են այս որոշման դեմ։
Եվրոպական գազատրանսպորտային Entsog խմբի տվյալների համաձայն՝ ռուսական խողովակաշարային գազի արտահանումը Եվրոպա 2025 թվականին նվազել է 44%-ով՝ հասնելով 18 միլիարդ խորանարդ մետրի։
Թարգմանությունը՝ Էմմա Չոբանյանի
