28.10.2026 | 19:53
Փլուզում՝ Երևանի տներից մեկում․ կան տուժածներ
Իրանում գործողությունը կարող է տևել 4 շաբաթ. Թրամփ
Քաղաքականություն
02.03.2026 | 10:20
ԱՄՆ նախագահ Դոնալդ Թրամփը հայտարարել է, որ Վաշինգտոնի ռազմական գործողություններն Իրանում, հավանաբար, կշարունակվեն հաջորդ չորս շաբաթների ընթացքում։ Այս մասին Սպիտակ տան ղեկավարն ասել է Daily Mail-ին տված հարցազրույցում, գրում է DW-ի ռուսական ծառայությունը։
Թրամփի խոսքով՝ ամեն ինչ ընթանում է ըստ ծրագրվածի։ ԱՄՆ-ը «ոչնչացրել է» Իրանի ղեկավարությանը, պնդել է նա՝ հավելելով, որ, ըստ երևույթին, խոսքը 48 անձի մասին է։
ԱՄՆ առաջնորդը հայտարարել է, որ բաց է Իրանի հետ հետագա բանակցությունների համար, բայց չի կարող ասել՝ արդյո՞ք դրանք տեղի կունենան «մոտ ապագայում»։
«Չգիտեմ։ Նրանք ուզում են խոսել, բայց ես ասացի՝ «Դուք պետք է խոսեիք անցյալ շաբաթ, ոչ թե այս շաբաթ»»,- ընդգծել է Թրամփը։
Սպիտակ տան ղեկավարը մարտի 1-ի դիմել է ամերիկացի ժողովրդին։ Նա խոստացել է «վրեժ լուծել» երեք զոհված ամերիկացի զինվորների համար, նոր վերջնագիր ներկայացրել Թեհրանին և կոչ արել աջակցել «ազատության» համար պայքարին։ Սա նրա երկրորդ ելույթն էր ժողովրդին վերջին 48 ժամվա ընթացքում։
Ավելի վաղ՝ մարտի 1-ին The Atlantic-ին տված հարցազրույցում Թրամփը մեղադրել է Իրանի կառավարությանը «չափազանց երկար սպասելու» մեջ։ Նա հավելել է, որ վերջին շաբաթներին Վաշինգտոնի հետ կապի մեջ գտնվող իրանցի բանակցողներից մի քանիսը սպանվել են հարվածների ժամանակ։
«Նրանք կարող էին գործարք կնքել։ Նրանք պետք է դա անեին ավելի շուտ։ Նրանք չափազանց խորամանկում էին»,- ասել է Թրամփը։
Թարգմանությունը՝ Էմմա Չոբանյանի
