07.09.2026 | 17:54
Արարատ Միրզոյանն ու Լատվիայի ԱԳ նախարարը արձանագրություն են ստորագրել
Փեզեշքիանն արձագանքել է Թրամփի՝ 32,000 զոհի մասին հայտարարությանը
Քաղաքականություն
26.02.2026 | 15:21
Հինգշաբթի առավոտյան Մազանդարան նահանգ այցի ընթացքում Իրանի նախագահ Մասուդ Փեզեշքիանը պատասխանել է ԱՄՆ նախագահ Դոնալդ Թրամփի վերջերս արած հայտարարությանը, որը պնդում էր, որ Իրանը սպանել է 32,000 մարդու՝ մեղադրանքն անվանելով անհիմն, գրում է Mehr-ը։
Նա նշել է, որ Իրանը հրապարակել է զոհերի ցուցակները նույնականացման համարներով։ Ըստ Փեզեշքիանի՝ անվտանգության և զինված ուժերի ավելի քան 2000 ներկայացուցիչներ «զոհվել են երկիրը և նրա ժողովրդին պաշտպանելիս»։
Իրանի նախագահը հավելել է, որ վերջին անկարգությունների ժամանակ ավելի քան 350 մզկիթ և 300 դպրոց է հրկիզվել։ Նա ցուցարարների գործողությունները որակել է որպես ահաբեկչություն, այլ ոչ թե՝ բողոքի ակցիա։
Փեզեշքիանն ասել է, որ հակառակորդները փորձում են վերացնել կարող գիտնականներին և որակավորված մասնագետներին՝ երկիրը թուլացնելու համար, սակայն ընդգծել է՝ «ազգային միասնությունն ու համագործակցությունը կանխում են որևէ ուժի կողմից Իրանը կաթվածահար անելը»։
Թրամփն ասել էր, որ ներկայումս Միացյալ Նահանգները նախընտրում է Իրանի հետ խնդիրը լուծել դիվանագիտական ճանապարհով, բայց դեռևս երաշխիքներ չի ստացել Թեհրանից՝ հրաժարվելու միջուկային զենք ունենալու մտքից։ Նա նշել էր, որ Իրանը և նրա պրոքսիները «տարածում են միայն ահաբեկչություն, մահ և ատելություն», հավելելով, որ վերջին շաբաթների ընթացքում Իրանի առաջնորդները սպանել են առնվազն 32,000 ցուցարարի: Նա նաև զգուշացրել էր, որ Իրանը մշակել է հրթիռներ, որոնք կարող են սպառնալ Եվրոպային, և աշխատում է հրթիռների վրա, «որոնք շուտով կհասնեն» ԱՄՆ-ին:
Թարգմանությունը՝ Էմմա Չոբանյանի
