Հայտնի է Թրամփի կալվածքի մոտ սպանված զինված տղամարդու ինքնությունը

Զինված տղամարդը, որը մտել էր Ֆլորիդայում ԱՄՆ նախագահ Դոնալդ Թրամփի Մար-ա-Լագո կալվածքի պահպանվող տարածք  և  սպանվել գաղտնի ծառայության աշխատակիցների կողմից, նույնականացվել է որպես 21-ամյա նկարիչ Օսթին Թաքեր Մարտին, Քեմերոն քաղաքից՝ Հյուսիսային Կարոլինայինց: Նրա ինքնությունը պարզվել է ամերիկյան լրատվամիջոցների կողմից՝ Հյուսիսային Կարոլինայի Մուր շրջանի շերիֆի գրասենյակի հայտարարության և զոհի ընտանիքի հաղորդագրությունների հիման վրա, գրում է DW-ի ռուսական ծառայությունը։

Իրավապահների մամուլի հաղորդագրության մեջ նշվում է, որ Մարտինի ազգականը կիրակի երեկոյան կապ է հաստատել շերիֆի գրասենյակի հետ՝ շաբաթ երեկոյից նրա անհետացման մասին հայտնելու համար, որից հետո նա ավելացվել է անհետ կորած անձանց ազգային տվյալների բազայում: Հետագայում դաշնային իշխանությունները շերիֆի գրասենյակին տեղեկացրել են Ֆլորիդայում Մարտինի վերաբերյալ ակտիվ հետաքննության մասին։

Նրա զարմիկ Բրեյդեն Ֆիլդսը նշել է, որ իր ազգականը զենքի հանդեպ հետաքրքրություն չի ունեցել։ «Մենք նրան վերցում էինք կրակելու, բայց նա նույնիսկ զենքի չէր դիպչում։ Միակ բանը, որ նա օգտագործել էր, պնևմատիկ զենքն էր », – ասել է նա։

Ֆիլդսը նաև պնդել է, որ Մարտինի ընտանիքի բոլոր անդամները «Թրամփի մեծ կողմնակիցներ են»։ Սակայն նա հավելել է, որ զոհը «երբեք իրականում չի խոսել քաղաքականության մասին և չի ցանկացել խառնվել։ Ըստ The New York Times-ի, Մարտինը գրանցված է որպես անկախ ընտրող նահանգային ընտրական ցուցակներում, ինչը նշանակում է, որ նա կապված չէ որևէ կուսակցության հետ։

Զինված տղամարդը փորձել էր մտնել Մար-ա-Լագո տեղական ժամանակով մոտավորապես ժամը 1:30-ին: Ըստ որոշ տեղեկությունների՝ նա անցել է Թրամփի կալվածքի բաց դարպասներով, երբ մեկ այլ մեքենա դուրս էր գալիս: Մարտինի ընտանիքի խոսքով՝ նա անհետացել է՝ հեռանալով արծաթագույն Volkswagen մակնիշի մեքենայով: Ֆլորիդայի Պալմ Բիչ շրջանի շերիֆի գրասենյակի տվյալներով՝ նմանատիպ մեքենա հայտնաբերվել է դեպքի վայրի մոտակայքում:

Իրավապահ մարմինների աշխատակիցը նաև նշել է, որ ներխուժողին «հրամայվել է գցել իր մոտ գտնվող երկու իրերը»։ «Այդ պահին նա իջեցրել է բենզինի բալոնը և բարձրացրել որսորդական հրացանը կրակելու դիրքի», – ասել է շերիֆը։ Դրանից հետո երկու գործակալներ և շերիֆի տեղակալը «կրակել են իրենց զենքերով՝ սպառնալիքը չեզոքացնելու համար»։

Շերիֆի գրասենյակը նաև հրապարակել է որսորդական հրացանի և պարկուճի լուսանկարը, որոնցով, ինչպես հայտարարվում է,  եկել  է Մարտինը։

Թարգմանությունը՝ Էմմա Չոբանյանի