«Ընդմիջմանը Հակոբ Մովսեսն առաջարկեց քննեմ իրեն․ որոշեցի նրան ցմահ ազատազրկման դատապարտել»․ Նազարյան․ ՏԵՍԱՆՅՈՒԹ

«Ընդմիջմանը պարոն Հակոբ Մովսեսն ինձ առաջարկեց, որ ես ևս իրեն քննեմ: Դե, ես ուսումնասիրեցի առկա բոլոր նյութերը, փաստարկները, հակափաստարկները և որոշեցի Հակոբ Մովսեսին դատապարտել ցմահ ազատազրկման»,- ԱԺ ամբիոնից հայտարարեց անկախ պատգամավոր Գեղամ Նազարյանը:

Հիշեցնենք՝ «Հայաստան» խմբակցությունը պնդում է՝ Հակոբ Հակոբյանը, լինելով ՀՌՀ անդամ, «1-in.am» լրատվական կայքին տված հարցազրույցում քաղաքական գնահատականներ է հնչեցրել Հայ Յեղափոխական Դաշնակցություն կուսակցության հասցեին, և այդ գնահատականներն ուղեկցվել են ատելության քարոզով:

«Պարոն Մովսես, համաձայն չե՞ք, որ այդ իրավիճակում Դուք նման կարծիք արտահայտելու իրավունք չունեք: Իրավունք չունեք, քանի որ որևէ քաղաքական ուժ, հատկապես խորհրդարանում ներկայացված ուժ, քաղբանտարկյալ չի համարում նրանց, ովքեր մարդկանց ստորաբար վիրավորում են: Այդ փաստը Դուք հաշվի չեք առել: Այս վեհաշուք միջավայրում և մթնոլորտում Ձեր քայլը անընդունելի է, հատկապես երբ Դուք չեք բողոքում, որ աշխատավարձ և պարգև եք ստանում, մինչդեռ ոմանք ստանում են և բողոքում: Հասկանո՞ւմ եք՝ պրիմիտիվ տակտիկա է, Դուք դրան չեք տիրապետում, և էդքանից հետո ուզում եք, որ խորհրդարանը Ձեզ արդարացնի՞: Լավ չի:

Մի՞թե գլխի չեք ընկնում, որ Դուք ևս պետք է ստանաք և անդադար բողոքեք: Անկեղծ ասած՝ Հակոբ Մովսեսից մեղադրյալ դուրս չի գա: Այսօր էլ մի տեղ սխալ կատարվեց և շարունակվեց: Եվ մեզնից ո՞վ է այն անմեղը, որ օրենքի ամեն մի ստորակետին հավատարիմ մարտիկ է և այսօր կարող է քար վերցնել և նետել Հակոբ Մովսեսի ուղղությամբ: Կարծում եմ՝ և ոչ մեկ չի կարողանալու: Եվ ինչպես միշտ, կրկին ասում եմ՝ մեզ անկեղծությունն է պակաս և ազնվությունը: Մեզ պակասում է նաև այն, որ մենք այդպես էլ հետևություն չարեցինք, թե ինչու եղավ պատերազմը, աղետը ու կործանումը, ու ուզում ենք ապրենք այնպես, ինչպես ապրել ենք մինչև պատերազմը: Այսպես չի կարող լինել: Չի կարող լինել, և ես Ձեզ վստահեցնում եմ, որ որևէ մեկը թույլ չի տա, որ մենք հանկարծ փորձենք այդպես ապրել, ինչպես առաջ ենք ապրել»,- նշեց Նազարյանը։

Մանրամասները՝ տեսանյութում։