Խնդրահարույց է անկախ պետական մարմնի անդամի կողմից քաղաքական ելույթներով հանդես գալը․ ԿԿՀ անդամ․ ՏԵՍԱՆՅՈՒԹ

Կոռուպցիայի կանխարգելման հանձնաժողովի նախագահի պարտականությունները կատարող Մարիամ Գալստյանը խորհրդարանում ներկայացրել է ԿԿՀ եզրակացությունը, որով արձանագրվել է, որ Հեռուստատեսության և ռադիոյի հանձնաժողովի անդամ Հակոբ Հակոբյանը վարքագծի կանոնների խախտում է թույլ տվել։

«Եզրակացությունն առնչվում է 2025 թվականի փետրվարի 13-ին հրապարակված «Առաջին լրատվական» կայքին Հակոբ Հակոբյանի կողմից տրված հարցազրույցի ընթացքում վերջինիս հնչեցրած խոսքերին, որոնք հանձնաժողովի կողմից քննարկվել են պետական պաշտոն զբաղեցնող անձանց վարքագծի կանոնագրքի 64-րդ կետի համատեքստում: Մասնավորապես՝ նշված կետի համաձայն՝ Հայաստանի Հանրապետության օրենսդրությամբ քաղաքական զսպվածության պարտավորություն ունեցող հանրային պաշտոն զբաղեցնող անձը պարտավոր է զերծ մնալ քաղաքական բնույթի հանրային ելույթներ ունենալուց:

Ընդ որում՝ նշված վարքականոնն ուղղակիորեն բխում է Սահմանադրության 197-րդ հոդվածի պահանջներից, որի 5-րդ մասի համաձայն՝ Հեռուստատեսության և ռադիոյի հանձնաժողովի անդամներն իրենց լիազորությունների իրականացման ժամանակահատվածում չեն կարող լինել որևէ կուսակցության անդամ կամ որևէ այլ կերպ զբաղվել քաղաքական գործունեությամբ: Հրապարակային ելույթներում նրանք պարտավոր են ցուցաբերել քաղաքական զսպվածություն:

Եզրակացությամբ Հանձնաժողովը քննարկել է նշված հարցազրույցի ընթացքում Հակոբ Հակոբյանի (Մովսես) կողմից խոսքի մի քանի հատված, սակայն խախտում արձանագրել է դրանցից միայն մեկով: Այս համատեքստում, հաշվի առնելով ժամանակի սղությունը, անհրաժեշտ եմ համարում ելույթում անդրադառնալ նաև պարոն Հակոբյանի կողմից վարույթի շրջանակներում բարձրացված մի քանի հարցերին և դրանց շուրջ Հանձնաժողովի դիրքորոշմանը»,-նշեց նա:

Մանրամասները՝ տեսանյութում։