20.05.2026 | 12:21
Պնդում եմ՝ Նարեկ Կարապետյանը միայն ՀՀ քաղաքացի է․ Գոհար Մելոյան
Տիգրան Խաչատրյան-Մայքլ Օ’Ֆլահերթի հանդիպում․ ուշադրության կենտրոնում՝ փախստականների իրավունքները
Քաղաքականություն
05.02.2026 | 22:35
Փոխվարչապետ Տիգրան Խաչատրյանն այսօր ընդունել է Եվրոպայի խորհրդի Մարդու իրավունքների հանձնակատար Մայքլ Օ’Ֆլահերթիի գլխավորած պատվիրակությանը․ հանդիպման ընթացքում քննարկվել են ՀՀ կառավարության իրականացրած բարեփոխումների օրակարգը, Ղարաբաղի փախստականների իրավունքների պաշտպանության և սոցիալ-տնտեսական ներառման ուղղությամբ տարվող աշխատանքները, ինչպես նաև մարդու իրավունքների և գենդերային հավասարության ոլորտներում համագործակցության հարցեր։ Այս մասին տեղեկացնում են Կառավարության մամուլի ծառայությունից։
«Ողջունելով հանձնակատարին՝ փոխվարչապետ Տիգրան Խաչատրյանը բարձր է գնահատել Եվրոպայի խորհրդի հետ ձևավորված համագործակցությունը Հայաստանի Հանրապետության՝ թափանցիկ և հաշվետու կառավարմանն ուղղված բարեփոխումների օրակարգի առաջմղման գործում: Այս համատեքստում փոխվարչապետը ընդգծել է Եվրոպայի խորհրդի կողմից Հայաստանի հետ իրականացվող 2023-2026թթ. գործողությունների ծրագրի նշանակությունը դատաիրավական համակարգի բարեփոխումների, տեղական ժողովրդավարության ամրապնդման, խոցելի խմբերի սոցիալական իրավունքների պաշտպանության և մի շարք այլ կարևոր ուղղություններով առաջընթացի ապահովման տեսանկյունից:
Զրուցակիցները մանրամասն անդրադարձ են կատարել Ղարաբաղի փախստականների իրավունքների պաշտպանության ուղղությամբ Կառավարության որդեգրած քաղաքականությանը: Մասնավորապես՝ մտքեր են փոխանակվել տեղահանվածների կրթական, առողջապահական, սոցիալական պաշտպանության ծառայությունների հասանելիության, ինչպես նաև կայուն զբաղվածության և բնակարանային ապահովման ուղղությամբ Կառավարության կողմից իրականացվող աշխատանքների վերաբերյալ:
Անդրադառնալով փախստականների սոցիալ-տնտեսական ներառման ուղղությամբ արձանագրված արդյունքներին՝ հանձնակատար Օ’Ֆլահերթին բարձր է գնահատել ՀՀ կառավարության արագ և շուտափույթ արձագանքը, ինչպես նաև անդրադարձել է վերջին տարիներին Հայաստանի ժողովրդավարական առաջընթացի և մարդու իրավունքների պաշտպանության ուղղություններով գրանցած ձեռքբերումներին:
Զրուցակիցները մտքեր են փոխանակել նաև գենդերային հավասարության, կանանց և երեխաների իրավունքների պաշտպանությանն առնչվող հարցերի լայն շրջանակի վերաբերյալ»,- ասվում է հաղորդագրությունում։
