Կառավարությունը Երևանի քաղաքապետին նոր լիազորություն կտա

ՀՀ կառավարությունը պատրաստվում է Երևանի քաղաքապետ Տիգրան Ավինյանին նոր լիազորություն վերապահել։ Որոշումն ընդգրկված է Կառավարության հունվարի 29-ի օրակարգում։

Մասնավորապես, Երևանի քաղաքապետը կկարողանա Հայաստանի անունից պայմանագիր կնքել «ԴԻԹԻ ՔՈՆՍԹՐԱՔՇՆ» և «ԴԻԹԻ ԴԵՎԵԼՈՓՄԵՆԹ» փակ բաժնետիրական ընկերությունների հետ։

Պայմանագիրը վերաբերում է Երևանի Կենտրոն վարչական շրջանի Նորագյուղ թաղամասի տարածքում՝ Իսակով և Մոնթե Մելքոնյան պողոտաների տրանսպորտային հանգույցով, «Պասկևիչի բլուր» անվամբ հայտնի հատվածում և դրանից դեպի հարավ՝ Հրազդան գետի կիրճով պարփակված տարածքում սեփականության օտարման գործընթացին։

Որոշմամբ սահմանվում են պետության և ձեռք բերողի իրավունքները, պարտականություններն ու պատասխանատվությունը՝ DOWNTOWN քաղաքաշինական ծրագրի իրականացման նպատակով։ Ձեռք բերողը պարտավորվում է օտարումների գործընթացը սկսել բլրային հատվածից, և միայն տվյալ հատվածում յուրաքանչյուր լոտում գտնվող գույքի ամբողջական իրացումից հետո կարող է օտարումներ իրականացնել հարթավայրային հատվածում՝ 1։2 հարաբերակցությամբ։

Որոշման համաձայն՝ ձեռք բերող ընկերությունը կարող է իրականացնել բացառապես ծրագրի օպերատորի գործառույթը և չի կարող հանդես գալ որպես լոտի ձեռք բերող և կամ կառուցապատող։ Տարածքում առկա համայնքային սեփականություն հանդիսացող հողամասերի օտարումն էլ կիրականացվի համայնքի կողմից։ Նախագիծը չզեկուցվող է, այն ներկայացվել է ՏԿԵ նախարարության կողմից։

Արփի Հակոբյան