Մենք կանգնած ենք Հայաստանի և նրա ժողովրդի կողքին. Մայա Սանդու

Մոլդովայի նախագահ Մայա Սանդուն Եվրոպայի խորհրդի Խորհրդարանական վեհաժողովի լիագումար նիստում ունեցած ելույթում խոսել է երկու պատերազմների մասին, որոնց բախվում է Եվրոպան, թե ինչպես են ժողովրդավարությունները ենթարկվում հարձակման, ինչպես են այդ հարձակումներն ուժեղանում տեխնոլոգիաների կողմից, և «թե ինչ պետք է անենք մեր խաղաղությունը, մեր ժողովրդավարական ընտրությունները և մեր ազատությունը պաշտպանելու համար»։

Նա ասել է, որ Ռուսաստանն Ուկրաինայում իրականացնում է ավանդական լայնածավալ ռազմական ներխուժում։ Ըստ նրա՝ մինչ «մեր ուշադրությունը ճիշտ կերպով կենտրոնացած է այս պատերազմի վրա, ծավալվում է երկրորդ պատերազմը․ դա պատերազմ է մեր ժողովրդավարությունների դեմ»։

Սանդուն անդրադաձել է նաև Հայաստանի թիրախավորմանը։

«Հիմա Հայաստանն է դառնում նույն ռազմավարության թիրախը՝ ուղղված ինքնիշխանության թուլացմանը, ժողովրդավարական ընտրությունների վրա ազդելուն և ներքին խոցելիությունների շահագործմանը։ Մենք կանգնած ենք Հայաստանի և նրա ժողովրդի կողքին, երբ նրանք աշխատում են դիմադրել այս ճնշումներին և պաշտպանել իրենց ժողովրդավարական ապագան»,- ընդգծել է Սանդուն։

Նա հավելել է, թե այս հիբրիդային պատերազմի վարման բոլոր եղանակներից ժողովրդավարությունների ապագայի համար ամենավտանգավորը տեղեկատվական մանիպուլյացիան է, որն ուժեղանում է տեխնոլոգիայի, անթափանց ալգորիթմների և արհեստական ​​բանականության միջոցով։

Թարգմանությունը՝ Էմմա Չոբանյանի