Քաղաքականություն
26.01.2026 | 21:48
Եվրախորհրդի Խորհրդարանական վեհաժողովը (ԵԽԽՎ) Ադրբեջանի իշխանություններին կոչ է անում անհապաղ ազատ արձակել քաղաքական դրդապատճառներով կալանավորված բոլոր անձանց, այդ թվում՝ 23 հայ կալանավորվածների (դեկտեմբերի 14-ին Հայաստան վերադարձվեցին 4 հայ գերիներ), մարդու իրավունքների պաշտպան Անար Մամեդլիի, ինչպես նաև Abzas Media-ի գործով ներգրավված լրագրողներին և լրատվամիջոցների աշխատողներին: Այս մասին ասվում է Ստրասբուրգում ԵԽԽՎ-ի կողմից ընդունված բանաձևի՝ Ադրբեջանին վերաբերող հատվածում։
«Հղում անելով իր 2527 (2024) բանաձևին՝ «Ադրբեջանի խորհրդարանական պատվիրակության դեռևս չվավերացված լիազորությունների վիճարկումը՝ էական հիմքերով», Վեհաժողովը շարունակում է լրջորեն մտահոգված լինել երկրում մարդու իրավունքների իրավիճակի հետագա վատթարացմամբ և, ենթադրաբար, քաղաքական դրդապատճառներով կալանավորված անձանց թվի աճով, այդ թվում՝ քաղաքացիական հասարակության ակտիվիստների, լրագրողների և լրատվամիջոցների աշխատողների, գիտնականների, ընդդիմադիր քաղաքական գործիչների և կառավարության այլ քննադատների»,- ասվում է բանաձևում:
Միաժամանակ, Վեհաժողովը կրկին կոչ է անում իշխանություններին՝ փոփոխություններ կատարել «Քաղաքական կուսակցությունների մասին» օրենքում, «Լրատվամիջոցների մասին» օրենքում և ոչ կառավարական կազմակերպությունների վերաբերյալ համապատասխան օրենսդրությունում՝ համապատասխանեցնելով «Ժողովրդավարություն իրավունքի միջոցով» Եվրոպական հանձնաժողովի (Վենետիկի հանձնաժողով) առաջարկություններին, և կատարել Մարդու իրավունքների եվրոպական դատարանի որոշումները: Վեհաժողովը վերահաստատում է իր դատապարտումը Ադրբեջանի Արտաքին գործերի նախարարության կողմից Վեհաժողովի բազմաթիվ անդամներին անցանկալի անձ հայտարարելու որոշման վերաբերյալ, որը, ի թիվս այլոց, 2527 (2024) բանաձևին կողմ քվեարկելու հետևանքով է, և կոչ է անում իշխանություններին անհապաղ չեղյալ հայտարարել այդ որոշումը: Վեհաժողովը նշում է Ադրբեջանի իշխանությունների և Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական կոմիտեի (CPT) միջև համագործակցության վերսկսման մասին և կոչ է անում իշխանություններին կառուցողական երկխոսություն սկսել Եվրոպայի խորհրդի բոլոր մարմինների, այդ թվում՝ հենց Վեհաժողովի հետ»,- նշվում է ԵԽԽՎ բանաձևում:
