Ուիթկոֆը հայտարարել է, որ ուկրաինական բանակցություններում միայն մեկ չլուծված խնդիր է մնացել

Շվեյցարիայի Դավոս քաղաքում Համաշխարհային տնտեսական ֆորումի ընթացքում հունվարի 22-ին, այսպես կոչված, «ուկրաինական նախաճաշի» ժամանակ ԱՄՆ նախագահ Դոնալդ Թրամփի հատուկ բանագնաց Սթիվ Ուիթկոֆը հայտարարել է, որ երկու կողմերը մոտ են Ուկրաինայում պատերազմը դադարեցնելու վերաբերյալ համաձայնության հասնելուն, գրում է Current time-ը։

Ուիթկոֆի խոսքով՝ մնում է միայն մեկ չլուծված հարց։ Ըստ երևույթին, խոսքը տարածքների վերահսկողության մասին է։

Նա հաստատել է, որ մեկնում է Մոսկվա՝ ՌԴ նախագահ Վլադիմիր Պուտինի հետ հանդիպման։ Ուիթկոֆը նաև նշել է, որ ինքը և ամերիկյան պատվիրակության մյուս անդամները հունվարի 21-ի երեկոյան քննարկումներ են անցկացրել ուկրաինական պատվիրակության հետ։ Այլ թեմաների շարքում քննարկվել է ուկրաինական տնտեսության վերականգնումը, Ուիթկոֆը խոսել է ազատ տնտեսական գոտու մասին։

Նման գոտի ստեղծելու գաղափարի մասին Դոնեցկի մարզում նախկինում էլ էր խոսվել, սակայն պարզ չէ, թե ում վերահսկողության տակ։ Ռուսաստանը պնդում է ամբողջ տարածաշրջանի վերահսկողությունը փոխանցելու հարցում․ ներկայում այն վերահսկում է ավելի քան 70%-ը։

Ուկրաինական պատվիրակության ղեկավար Ռուստեմ Ումերովը հայտնել է, որ Ուկրաինայի ներկայացուցիչները Դավոսում հանդիպումներ են ունեցել ամերիկյան խոշոր ներդրումային BlackRock ընկերության ներկայացուցիչների, Նորվեգիայի և Կատարի վարչապետների, ինչպես նաև ամերիկացի բանակցողներ Ջարեդ Քուշների և Սթիվ Ուիթկոֆի հետ։

ԱՄՆ-ի և Ուկրաինայի նախագահների հանդիպումը կարող է տեղի ունենալ Դավոսում հունվարի 22-ին։ Դոնալդ Թրամփը հայտարարել է այդ մասին, բայց հանդիպման մասին դեռևս պաշտոնապես չի հայտարարվել։

ՌԴ նախագահ Վլադիմիր Պուտինը երեկ Անվտանգության խորհրդի նիստում հայտարարել է, որ պատրաստ է քննարկել ԱՄՆ-ում սառեցված ռուսական ակտիվներից միջոցներն ուղղելու հարցը՝ «ռազմական գործողությունների ընթացքում վնասված տարածքների վերականգնման համար»՝ խաղաղության համաձայնագրերի ենթադրական կնքումից հետո։

Պուտինը չի մանրամասնել, թե որ տարածքների մասին է խոսքը՝ Ուկրաինայի վերահսկողության տակ մնացած տարածքների՞, թե՞ պատերազմի ժամանակ ռուսական բանակի կողմից գրավված տարածքների։ Ռուսաստանի նախագահն առաջին անգամ չի բացառել ռուսական ակտիվներն այդ նպատակներով օգտագործելու հնարավորությունը։

Թարգմանությունը՝ Էմմա Չոբանյանի