20.09.2026 | 20:35
«Հայանտառ»-ի տարածքում մեծ քանակի հատված փայտանյութ է հայտնաբերվել
Իրանի իշխանությունները սկսել են բռնագրավել բողոքի ցույցերին աջակցած ընկերությունների և ձեռնարկատերերի ունեցվածքը. FT
Քաղաքականություն
21.01.2026 | 21:13
Իրանի իշխանությունները զանգվածային բողոքի ցույցերից հետո ուժեղացրել են ճնշումները՝ բռնագրավելով ընկերությունների գույքը և փակելով բիզնեսներ ամբողջ երկրում՝ հակակառավարական ցույցերին աջակցելու մեղադրանքներով, հաղորդում է Financial Times-ը։
Հունվարի 20-ին Թեհրանի Գլխավոր դատախազությունը հայտարարել է, որ ավելի քան 20 մարզիկների, դերասանների և կինոգործիչների դեմ գործեր են հարուցել բողոքի ցույցեր հրահրելու համար: Հայտարարվել է, որ նրանց գույքը կօգտագործվի բողոքի ցույցերից պատճառված վնասի փոխհատուցման համար, գրում է Meduza-ն։
Բացի այդ, շուրջ 60 սրճարան նույնականացվել է որպես «ուղղակիորեն կամ անուղղակիորեն» «ահաբեկչական գործողություններին» աջակցող։ FT-ն, հղում անելով իրանական Tasnim լրատվական գործակալությանը, հաղորդում է, որ ձերբակալվել է հայտնի սրճարանների ցանցի և առևտրի կենտրոնի սեփականատեր Մոհամմադ Սաեդինիանը, իսկ նրա գույքը բռնագրավվել է։
Իշխանությունները նաև փակել են Իրանի բարեփոխական «Ham-Mihan» թերթը՝ բողոքի ցույցերի ժամանակ պետական հիվանդանոցների գործունեությունը լուսաբանելու համար: Մեկ այլ լրատվական գործակալություն և տեղեկատվական պորտալ մեղադրվում են կեղծ տեղեկություններ տարածելու մեջ (անունները չեն հրապարակվել):
Իրանի ոստիկանապետ Ահմադ Ռեզա Ռադանը հայտարարել է, որ բողոքի ցույցերին միացած երիտասարդները, հավանաբար, «խաբված» են եղել։ Նա նշել է, որ «անկարգությունները ղեկավարած և դրանց մասնակցած անձինք կենթարկվեն խիստ պատժի»։ Ըստ պաշտոնյայի՝ արտասահմանյան հետախուզական գործակալությունների կողմից խաբված յուրաքանչյուր ոք պետք է հանձնվի երեք օրվա ընթացքում՝ մեղադրանքի մեղմացման դիմաց։
2025 թվականի դեկտեմբերի վերջից Իրանում տեղի են ունենում կառավարության դեմ զանգվածային բողոքի ցույցեր: ԱՄՆ-ում գործող իրանական HRANA մարդու իրավունքների պաշտպանության գործակալության տվյալներով՝ Իրանում բողոքի ցույցերի դաժան ճնշման հետևանքով զոհվել է ավելի քան 3,000 մարդ։
Իրանի գերագույն հոգևոր առաջնորդ այաթոլլա Ալի Խամենեին հայտարարել է, որ բողոքի ցույցերի ժամանակ «մի քանի հազար» մարդ է զոհվել՝ մեղադրելով ցուցարարներին և ԱՄՆ կառավարությանը։
Թարգմանությունը՝ Էմմա Չոբանյանի
