18.01.2026 | 14:06
Թրամփը ցանկանում է մեկ միլիարդ դոլար երկրներից՝ իր ստեղծած Խաղաղության խորհրդում մշտական անդամակցության համար
Թրամփը հայտարարել է Եվրոպայի ութ երկրների համար 10% մաքսատուրքի սահմանման մասին՝ Գրենլանդիայի պատճառով
Քաղաքականություն
18.01.2026 | 10:59
ԱՄՆ նախագահ Դոնալդ Թրամփը հայտարարել է, որ փետրվարի 1-ից Եվրոպայի ութ երկրների համար կգործի 10 տոկոսանոց ներմուծման մաքսատուրք՝ ամերիկյան շուկա մատակարարվող ապրանքների վրա, հայտնում է Meduza-ն։
Ինչպես գրել է Թրամփը Truth սոցիալական ցանցում իր էջում, մաքսատուրքը վերաբերում է Մեծ Բրիտանիային, Գերմանիային, Դանիային, Նիդերլանդներին, Նորվեգիային, Ֆինլանդիային, Ֆրանսիային և Շվեդիային։ Նրա խոսքով՝ այդ երկրները կվճարեն մաքսատուրքը այնքան ժամանակ, մինչև ձեռք բերվի համաձայնություն Գրենլանդիան ԱՄՆ-ին փոխանցելու վերաբերյալ։
Թրամփը հայտարարել է, որ եթե գործարքը չկնքվի մինչև հունիսի 1-ը, մաքսատուրքի չափը կբարձրանա մինչև 25 տոկոս։
«Մենք երկար տարիներ սուբսիդավորել ենք Դանիային, Եվրամիության բոլոր երկրներին և այլ պետությունների՝ նրանցից չգանձելով մաքսատուրքեր կամ որևէ այլ փոխհատուցում։ Այժմ, դարեր անց, Դանիային ժամանակն է վերադարձնել պարտքը․ վտանգված է համաշխարհային խաղաղությունը։ Չինաստանն ու Ռուսաստանը ցանկանում են ձեռք բերել Գրենլանդիան, իսկ Դանիան ոչինչ չի կարող անել դրա դեմ»,-գրել է Թրամփը՝ կրկին կրկնելով Գրենլանդիայի վատ պաշտպանված լինելու մասին իր թեզերը։
Հիշեցնենք՝ հունվարի 16-ին Թրամփը սպառնացել էր մաքսատուրքեր սահմանել «այն երկրների դեմ, որոնք չեն համաձայնի Գրենլանդիայի նկատմամբ ԱՄՆ-ի հավակնություններին»։
«Գրենլանդիան մեզ անհրաժեշտ է ազգային անվտանգության համար», – հայտարարել էր Թրամփը Սպիտակ տանը կայացած միջոցառման ընթացքում՝ այդ ժամանակ չհստակեցնելով մաքսատուրքերի հնարավոր չափը։
Դրանից մեկ օր առաջ Եվրոպայի մի շարք երկրներ, այդ թվում՝ Գերմանիան, Շվեդիան, Ֆրանսիան և Նորվեգիան, հայտարարել էին Գրենլանդիա իրենց զինվորականների ուղարկման մասին՝ հետախուզական առաքելության շրջանակում, որի նպատակն է ամրապնդել տարածաշրջանի անվտանգությունը, ինչպես նաև օգնել Դանիային պատրաստվել 2026 թվականի վերջում նախատեսվող խոշոր ռազմական զորավարժություններին։
