28.07.2026 | 18:40
ԱԶԲ-ի հետ քննարկվել են Սիսիան–Քաջարան ճանապարհի և Դիլիջանի նոր թունելի ծրագրերը
Սամվել Կարապետյանը 2 ամսով կալանավորվեց
Հասարակություն
16.01.2026 | 17:55
Սամվել Կարապետյանի նկատմամբ երկու ամիս ժամկետով կալանք է կիրառվել։ Այս մասին Factor.am-ին հայտնեցին Հակակոռուպցիոն դատարանից։ Նա արդեն կալանավայրում է։
Վերաքննիչ հակակոռուպցիոն դատարանի բակում լրագրողների հետ զրույցում Արամ Վարդևանյանն ասել է, որ խափանման միջոցը փոխած դատավոր Սուրեն Խաչատրյանի կողմից կայացված դատական ակտն «անհասկանալի է»։
Ավելի վաղ հայտնել էինք, որ գործարար Սամվել Կարապետյանի տնային կալանքը փոխվել է կալանքով։ Դատախազությունը բողոքարկել էր Կարապետյանի նկատմամբ տնային կալանք և գրավ կիրառելու որոշումը ու պահանջում էր նրան կրկին կալանավայր տեղափոխել։
Դեկտեմբերի 30-ին էր դատարանը փոխել Կարապետյանի խափանման միջոցը, և կալանքը փոխարինել գրավով ու տնային կալանքով։ Նույն օրը նա ՔԿՀ-ից տուն տեղափոխվեց։
Հիշեցնենք՝ հունիսի 17-ին Սամվել Կարապետյանին մեղադրանք էր առաջադրվել Քրեական օրենսգրքի 422-րդ հոդվածի 2-րդ մասով, այն է՝ իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչը, որը կատարվել է հրապարակայնորեն ցուցադրվող ստեղծագործությունները կամ զանգվածային լրատվության միջոցները կամ տեղեկատվական կամ հաղորդակցական տեխնոլոգիաներն օգտագործելով: Դատարանը նախաքննական մարմնի միջնորդությունը բավարարել էր և Կարապետյանի նկատմամբ ընտրել խափանման միջոց կալանքը, որն օգոստոսի 15-ին ևս 2 ամսով երկարաձգվել էր։
Ավելի ուշ նրան առաջադրվել էր նաև փողերի լվացման մեղադրանք, իսկ շաբաթներ առաջ մեղադրանքը փոփոխվեց և լրացվեց. Սամվել Կարապետյանը մեղադրվում է Քրեական օրենսգրքի 296-րդ հոդվածի 3-րդ մասի 2-րդ և 3-րդ կետերի՝ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով առանձնապես խոշոր չափերով փողերի լվացման հատկանիշներով։
Անի Թամրազյան
