03.07.2026 | 01:00
ԱԱ-2026. Իսպանիան վստահ հաղթեց և 1/8 եզրափակիչում է. ՏԵՍԱՆՅՈՒԹ
Բացահայտվել են «Հայանտառ»-ի պաշտոնյայի կողմից կաշառք ստանալու դեպքեր. 4 անձի գործով նախաքննությունն ավարտվել է
Հասարակություն
13.01.2026 | 16:23
«Հայանտառ»-ի մասնաճյուղերից մեկի պահեստապետը սահմանված չափից ավելի փայտանյութ տրամադրելու դիմաց կաշառք է ստացել։ ՀՀ հակակոռուպցիոն կոմիտեից հայտնում են 4 անձի վերաբերյալ քրեական վարույթով նախաքննությունն ավարտվել է։
«ՀՀ հակակոռուպցիոն կոմիտեում քննված քրեական վարույթով իրականացված նախաքննությամբ պարզվել է, որ «Հայանտառ» ՊՈԱԿ-ի մասնաճյուղերից մեկի պահեստապետը, իր իշխանական լիազորություններով պայմանավորված ազդեցությունն օգտագործելով, Վանաձոր համայնքի բնակչի և նրա որդու օգտին թողտվություն կատարելու, այն է՝ տվյալ մասնաճյուղից սահմանված չափից ավելի փայտանյութ տրամադրելու դիմաց 2025 թվականի հուլիսին կաշառք է ստացել նրանցից:
Նախաքննությամբ պարզվել է նաև, որ վերը նշված Վանաձոր համայնքի բնակիչը, մեկ այլ անձի հետ նախնական համաձայնությամբ, իրեն փայտանյութ տրամադրելու դիմաց «Հայանտառ» ՊՈԱԿ-ի պահեստապետին կաշառք է տվել նաև 2025 թվականի հուլիսից օգոստոսն ընկած ժամանակահատվածում:
Նախաքննությամբ բացահայտվել է նաև սահմանված չափից ավել փայտանյութ տրամադրելու դիմաց «Հայանտառ» ՊՈԱԿ-ի նույն պաշտոնատար անձին 2025 թվականի ընթացքում մեկ այլ քաղաքացու կողմից կաշառք տալու դեպք:
Կաշառք ստանալու համար պահեստապետին մեղադրանք է ներկայացվել ՀՀ քրեական օրենսգրքի 435-րդ հոդվածի 1-ին մասով և 435-րդ հոդվածի 2-րդ մասի 3-րդ կետով (3 դրվագ):
Նախաքննության ընթացքում ևս 3 անձանց մեղադրանքներ են ներկայացվել կաշառք տալու համար՝ ՀՀ քրեական օրենսգրքի 436-րդ հոդվածի 2-րդ մասի 1-ին և 3-րդ կետերով (3 դրվագ) և 436-րդ հոդվածի 1-ին մասով:
Քրեական վարույթով նախաքննությունն ավարտվել է, և վարույթի նյութերը մեղադրական եզրակացությամբ ուղարկվել են հսկող դատախազին՝ այն հաստատելու և դատարան ուղարկելու միջնորդությամբ»,- ասված է հաղորդագրությունում։
