18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
Էրդողանը հաստատել է, որ երկուշաբթի Թրամփի հետ հեռախոսազրույց է ունենալու
Քաղաքականություն
02.01.2026 | 20:27
Թուրքիայի նախագահ Ռեջեփ Թայիփ Էրդողանը ուրբաթ օրը հայտարարել է, որ երկուշաբթի կեսօրին ևս մեկ հեռախոսազրույց կունենա ԱՄՆ նախագահ Դոնալդ Թրամփի հետ, որը կնշանավորի երկու առաջնորդների միջև բարձր մակարդակի դիվանագիտական գործակցությունը, գրում է Turkiye today-ը։
Ուրբաթօրյա աղոթքից հետո Ստամբուլում լրագրողների հետ զրույցում Էրդողանը հաստատել է նախատեսված զանգը, բայց չի մանրամասնել քննարկվելիք թեմաների մասին։
Իր ելույթի ընթացքում Էրդողանը նաև անդրադարձել է Նոր տարվա օրը Ստամբուլի Գալաթա կամրջի վրա տեղի ունեցած պաղեստինամետ մեծ ցույցին։ Նա հավաքը բնութագրել է որպես «պատմական պահ» և ասել, որ այն ցույց է տալիս, որ «Պաղեստինը միայնակ չէ»։
Թուրքիայի նախագահը շարունակել է քննադատել Իսրայելի ռազմական գործողությունները Գազայում՝ Թուրքիան ներկայացնելով որպես պաղեստինյան շահերի ականավոր կողմնակից միջազգային հանրության շրջանում։
Էրդողանը կոշտ քննադատության է ենթարկել Իսրայելի վարչապետ Բենիամին Նեթանյահուին՝ նրան անվանելով «այս փարավոնը» և զգուշացնելով, որ նրա գործողությունները «անպատիժ չեն մնա»։
Թուրքիայի առաջնորդն ասել է, որ Նեթանյահուն «արժանացել է անթիվ ճնշված մարդկանց անեծքներին՝ երիտասարդներից մինչև տարեցներ»։
«Գազայում քամու և անձրևի տակ ժամանակավոր վրաններում ապրող երեխաների տառապանքը անպատասխան չի մնա, և Նեթանյահուն չի խուսափի պատասխանատվությունից», – ասել է նա։
Թարգմանությունը` Էմմա Չոբանյանի
