05.10.2026 | 17:22
Միրզոյանն ու Արաղչին քննարկել են Հայաստան–Իրան երկրորդ կամրջի կառուցումն ու ԹՐԻՓՓ նախագիծը
Կդադարեցվի Վարդան Ղուկասյանի նկատմամբ քրեական հետապնդումը՝ Միութենական պետությանը միանալու հայտարարության մասով
Հասարակություն
30.12.2025 | 17:25
Քննչական կոմիտեում քննվող քրեական վարույթով որոշում է կայացվել Գյումրիի քաղաքապետ Վարդան Ղուկասյանի նկատմամբ իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչեր հնչեցնելու վերաբերյալ քրեական հետապնդումը դադարեցնել՝ մեղսագրված արարքը չկատարելու հիմքով։ Այս մասին հայտնում է Ղուկասյանի փաստաբան Արամայիս Հայրապետյանը։
«Նույն որոշմամբ որոշվել է նաև Վարդան Ղուկասյանի նկատմամբ ՀՀ քրեական օրենսգրքի 329-րդ հոդվածի 2-րդ մասի 2-րդ կետով (Ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը, ինչպես նաև այդ նպատակով նյութեր կամ առարկաներ տարածելը) հանրային քրեական հետապնդում չհարուցել մեղսագրված արարքը չկատարելու հիմքով»,-նշել է նա։
Հիշեցնենք՝ քրեական հետապնդումը հարուցվել էր սեպտեմբերի 16-ին և 23-ին՝ Հակակոռուպցիոն դատարանի բակում Հայաստանի՝ այլ երկրների հետ միություն կազմելու վերաբերյալ իր հայտարարությունների համար (Ղուկասյանը հայտարարել էր՝ «Ով դեմ է, որ Հայաստանը միանա Միութենական պետությանը, թրքահպատակ շան տղա է»-խմբ․)։
Եվգենյա Համբարձումյան
