Իրանում խանութպանները բողոքի ակցիա են անցկացնում՝ արժույթի ռեկորդային ցածր անկման պատճառով

Իրանցի առևտրականներն ու խանութպանները երկրորդ օրն է՝ բողոքի ցույցեր են անցկացրել այն բանից հետո, երբ երկրի արժույթը կտրուկ նվազել է ԱՄՆ դոլարի նկատմամբ՝ հասնելով նոր ռեկորդային ցածր մակարդակի, գրում է France 24-ը։

Սոցիալական ցանցերում տարածված տեսանյութերում հարյուրավոր մարդկանց մասնակցությամբ հանրահավաքներ են Թեհրանի կենտրոնում գտնվող Սաադի փողոցում, ինչպես նաև Թեհրանի գլխավոր Մեծ շուկայի մոտ գտնվող Շուշ թաղամասում։ Վաճառականները AP-ին պատմել են, որ փակել են իրենց խանութներն ու մյուսներին հորդորել՝ նույնն անել։

Կիրակի բողոքի ցույցերը սահմանափակվել են Թեհրանի կենտրոնում գտնվող երկու խոշոր շարժական շուկաներով, որտեղ ցուցարարները հակակառավարական կարգախոսներ են վանկարկել։

Դեկտեմբերի 28-ին Իրանի ռիալը կտրուկ անկում է գրանցել՝ հասնելով մեկ դոլարի դիմաց 1,42 միլիոն ռիալի։ Երկուշաբթի այն վաճառվել է մեկ դոլարի դիմաց 1,38 միլիոն ռիալով։

Պետական ​​վիճակագրական կենտրոնի տվյալներով՝ դեկտեմբերին գնաճի մակարդակը, նախորդ տարվա նույն ժամանակահատվածի համեմատ, աճել է մինչև 42,2%, ինչը 1,8%-ով ավելին է նոյեմբերի համեմատ։ Վիճակագրական կենտրոնի տվյալներով՝ սննդամթերքի գները, նախորդ տարվա դեկտեմբերի համեմատ, աճել են 72%-ով, իսկ առողջապահական և բժշկական ապրանքներինը՝ 50%-ով։ Շատ քննադատներ այս մակարդակը համարում են մոտեցող գերինֆլյացիայի նշան։

Իրանական պաշտոնական լրատվամիջոցների հաղորդագրությունները, որոնց համաձայն՝ կառավարությունը նախատեսում է բարձրացնել հարկերը մարտի 21-ին սկսվող իրանական նոր տարում, ավելի մեծ մտահոգություն են առաջացրել։

Իրանի կենտրոնական բանկի ղեկավար Մոհամմադ Ռեզա Ֆարզինը հրաժարական է տվել, քանի որ երկիրը պայքարում է ռիալի անկման և բարձր գնաճի դեմ, հաղորդել է «Նուրնյուզ» գործակալությունը՝ հղում անելով նախագահի աշխատակազմի պաշտոնյայի։

Ֆարզինը Կենտրոնական բանկը ղեկավարում էր 2022 թվականի դեկտեմբերից: Նրա հրաժարականը կքննարկի Իրանի նախագահ Մասուդ Փեզեշքիանը։

Թարգմանությունը՝ Էմմա Չոբանյանի