Արցախցիների բռնի տեղահանումը՝ կասկածի տակ․ Փաշինյանն ու իր թիմը փոխել են խոսույթը. ՏԵՍԱՆՅՈՒԹ

Երեկ կառավարության հերթական նիստն էր, որտեղ ավելի քան 15 րոպե վարչապետը, աշխատանքի և սոցիալական հարցերի նախարարը և վարչապետի աշխատակազմի ղեկավարը քննարկում էին արցախցի ընտանիքներին կացարանով ապահովելու համար վարձակալության վճարի մասնակի հատուցման սոցիալական աջակցության ծրագիրը։ Ինչպես նախագծում, այնպես էլ ամբողջ քննարկման ժամանակ չի հնչում «բռնի տեղահանված» ձևակերպումը։ Փաշինյանը, Թորոսյանը և Հարությունյանը գործածում են միայն «տեղահանված» բառը։  Այնինչ, շաբաթներ առաջ պատկերն այլ էր։

Ինչո՞ւ են Փաշինյանը և Կառավարության անդամները դադարել իրերն իրենց անունով կոչել․ Factor TV-ի հարցին նախարար Թորոսյանը խուսափողական պատասխան տվեց․ «Ես կարծում եմ, որ մեր հայրենակիցներին աջակցելն է կարևոր, և ոչ թե ինչ-որ տերմիններ օգտագործելը։ Եկեք բովանդակությանն անդրադառնանք, ոչ թե ձևին»։

«Վերադարձ դեպի Դիզակ» ՀԿ նախագահ, արցախցի Մարգարիտա Քարամյանի կարծիքով՝ ՀՀ իշխանությունը կատարում է Ադրբեջանի թելադրանքը։

«Ադրբեջանն ասում է, որ հայերն ինքնակամ են դուրս եկել, ոչ մի բռնություն չի եղել, ոչ մի բան չի եղել։ Դատարանից հայցեր են ուզում հետ վերցնել, փակում են, ընդհանրապես Ղարաբաղի վերադարձի հարցն են փակում։ Սա ծրագիր է․ իրենք պետք է այնպես անեն, որ Ադրբեջանը մաքուր դուրս գա, հիմա մաքրում են Ադրբեջանի դեմքը»,- ասում է Քարամյանը։

Ադրբեջանցի պաշտոնյաների կողմից մեկ անգամ չէ, որ պնդումներ են հնչել, թե, իբր, հայ բնակչությունը սեփական կամքով է որոշել հեռանալ ԼՂ-ից և տեղի ունեցածը բռնի տեղահանություն չէ։ 

«Էթնիկ զտումների մասին պնդումները «վերաինտեգրման գործընթացը» խաթարելու նպատակով են արվում»,- ամիսներ առաջ հայտարարել էր Ադրբեջանի արտաքին գործերի նախարար Ջեյհուն Բայրամովը։

Իրավապաշտպան Էդգար Խաչատրյանն ընդգծում է՝ նման կարևոր բառի, այսպես ասած, «զեղչումը» խնդրահարույց է հենց մարդու իրավունքների տեսանկյունից։

«Սա լուրջ խնդիրների է հանգեցնելու, և այդ պարագայում նաև իրավական խնդիր կա, որովհետև այդ քաղաքացիների իրավունքներն են ոտնահարվել, իսկ պետությունը, ըստ էության, խոչընդոտում է, որպեսզի այդ քաղաքացիներն իրենց ոտնահարված իրավունքները միջազգային ատյաններում վերականգնեն։ Բայց սա ընդհանրապես այդ մոտեցման շրջանակում է, և փոխում է Հայաստանի Հանրապետությունն իր նարատիվը, որպեսզի ավելի դյուրին, ավելի հեշտ դարձնի, այսպես կոչված, խաղաղության այդ գործընթացը»,- ընդգծում է իրավապաշտպանը։

Խաղաղության նախաստորագրված համաձայնագրում հատուկ հոդված  կա միմյանց դեմ միջազգային ատյաններում ներկայացված հայցերի հետկանչման մասին։  Քաղհասարակության ներկայացուցիչներն ու իրավապաշտպանները դրա հետ կապված ռիսկերի մասին ահազանգում են արդեն տևական ժամանակ, այժմ նոր մտահոգություններ են ծագում։

«Շատ դեպքերում այդ միջազգային ատյանները նաև ենթադրում են պետության կողմից տեղեկատվություն, և եթե պետությունը, ըստ էության, չարձագանքի համապատասխան ձևով, այդ դեպքում իրոք սահմանափակվում է այդ քաղաքացու իրավունքը կամ իր ոտնահարված իրավունքը վերականգնելու հնարավորությունը։ Դա նվազեցնում է Ադրբեջանի պատասխանատվությունը և հնարավորություն է տալիս նաև աշխարհաքաղաքական խաղերում շատ ավելի իր համար լավ դիրքերից հանդես գալու»,- նշում է Էդգար Խաչատրյանը։

Փաշինյանն ու Կառավարության մյուս անդամներն արդյո՞ք այս խոսույթը հետևողականորեն կշարունակեն՝ պարզ կդառնա արդեն հաջորդ տարի․ դեկտեմբերի 25-ի նիստն այս տարվա վերջինն էր։   

Մանրամասները՝ տեսանյութում։

Ռոզա Վարդանյան