26.12.2025 | 18:35
Պուտինի հանձնարարությամբ ՌԴ-ի և ԱՄՆ-ի միջև շփում է տեղի ունեցել. Կրեմլ
Վարզդատ Լալայանը, Արթուր Դավթյանը և Մալխաս Ամոյանը՝ Հայաստանի լավագույն մարզիկներ
26.12.2025 | 14:47
ՀՀ կրթության, գիտության, մշակույթի և սպորտի նախարարությունն անցկացրել է «Սպորտի ոլորտում տարվա լավագույնների ընտրություն» մրցույթը, որի հաղթողները որոշվել են ԿԳՄՍՆ կողմից հավատարմագրված մարզական լրագրողների քվեարկության արդյունքների համադրմամբ, հաղորդում է նախարարության մամուլի ծառայությունը։
Մարզական լրագրողներն իրականացրել են փակ, գաղտնի քվեարկություն, որի արդյունքներն ամփոփել է ԿԳՄՍ նախարարի հրամանով ձևավորված հանձնաժողովը:
Քվեարկությանը հետևել է ԿԳՄՍ նախարարի տեղակալ Հասմիկ Ավագյանը: Նա շնորհակալություն է հայտնել լրագրողներին մասնակցության համար՝ ընդգծելով միջոցառման կարևորությունը սպորտի ոլորտում. «Մարզական լրագրողները հնարավորություն ունեն ընտրելու այն մարզիկներին, որոնք 2025 թ. ընթացքում լավագույնս հանրահռչակել են Հայաստանի Հանրապետությունը՝ իրենց մարզական նվաճումներով ՀՀ դրոշը բարձր պահելով տարբեր մրցահարթակներում և գրանցել են լավագույն արդյունքներ միջազգային սպորտային քարտեզում»: Հասմիկ Ավագյանը նաև շնորհակալություն է հայտնել նաև ցանկերում այս տարի չընդգրկված մարզիկներին, և նշել՝ անկախ մրցույթից՝ նրանց ջանքերն ու վաստակը մշտապես գնահատելի են պետության կողմից:
Ըստ անվանակարգերի հաղթողներն են՝
Լավագույն 3 մարզիկներ՝ Վարզդատ Լալայան (ծանրամարտ), Արթուր Դավթյան (սպորտային մարմնամարզություն), Մալխաս Ամոյան (հունահռոմեկան ընբշամարտ)
Լավագույն կին մարզիկ՝ Ալեքսանդրա Գրիգորյան (ծանրամարտ)
Հաշմանդամություն ունեցող լավագույն մարզիկ՝ Սարգիս Սարգսյան (շախմատ)
Լավագույն թիմ՝ Հայաստանի ֆուտզալի ազգային հավաքական
Լավագույն երիտասարդ մարզիկ՝ Գասպար Տերտերյան (հունահռոմեկան ընբշամարտ)
Վերադարձ մեծ սպորտ և/կամ հայտնություն՝ Սուրեն Հարությունյան (կարատե)
Հայաստանի Հանրապետությունը լավագույնս հանրահռչակած մարզիկ՝ Համլետ Մանուկյան (սպորտային մարմնամարզություն)
Լավագույն մարզիչ՝ Փաշիկ Ալավերդյան (ծարամարտ):
«Հանդիսատեսի համակրանք» անվանակարգում հաղթողը որոշվելու է առցանց քվեարկությամբ, որը կավարտվի այսօր՝ ժամը 17:00-ին:
Հանձնաժողովի անդամներն ու քվեարկությանը մասնակցած լրագրողներն անդրադարձել են մրցույթի անցկացման ձևաչափին, կատարել որոշակի դիտարկումներ և առաջարկություններ: Մասնավորապես՝ մրցութային հանձնաժողովի անդամ, Հայաստանի ազգային պարալիմպիկ կոմիտեի նախագահ Հակոբ Աբրահամյանը կարևորել է այն հանգամանքը, որ արդեն երկրորդ տարին է՝ սահմանվել է «Հաշմանդամություն ունեցող լավագույն մարզիկ» անվանակարգը՝ արժևորելու նաև այս մարզիկներին, որոնք նվաճումներ են ունենում տարբեր մարզաձևերում: Նրա գնահատմամբ՝ մրցույթը պատշաճ կազմակերպված է:
«Սպորտի ոլորտում տարվա լավագույնների ընտրություն» մրցույթի նպատակն է խրախուսել և մեծարել ընթացիկ տարում նվաճումներ կամ նշանակալի հաջողություններ գրանցած, ինչպես նաև իրենց մրցելույթներով ՀՀ ճանաչելիության և հեղինակության բարձրացմանը, պետական խորհրդանիշների, ազգային արժեքների հանրահռչակմանը նպաստած հայ մարզիկներին և մարզիչներին:
