18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
Գործկոմի նոր անդամ, տարվա ամփոփում․ ՀՖՖ հերթական ժողովի մանրամասները․ ՏԵՍԱՆՅՈՒԹ
22.12.2025 | 20:03
Հայաստանի ֆուտբոլի ֆեդերացիայի գրասենյակում դեկտեմբերի 22-ին կայացավ ՀՖՖ 26-րդ հերթական ժողովը, որի օրակարգին կարող եք ծանոթանալ այստեղ:
Նախքան օրակարգին անցնելը ելույթ ունեցավ ՖԻՖԱ-ի Անդամ ասոցիացիաների Եվրոպայի տարածաշրջանային համակարգող Մարկո Ֆերին։ Նա ընդգծեց, որ տարիների ընթացքում ՖԻՖԱ-ն և ՀՖՖ-ն ձևավորել են ամուր և փոխադարձ վստահության վրա հիմնված համագործակցություն, որը շարունակում է զարգանալ և տալ շոշափելի արդյունքներ։
Այնուհետև ՈՒԵՖԱ-ի Հեթտրիկ ծրագրի պատասխանատու Դենիս Բաստարին ողջույնի խոսք հղեց տեսաուղերձով։ Նա բարձր գնահատեց անցնող տարում ՀՖՖ-ի կատարած աշխատանքը և վերահաստատեց ՈՒԵՖԱ-ի՝ ՀՖՖ-ի նախաձեռնություններին աջակցելու պատրաստակամությունը։
Հաջորդիվ ՀՖՖ-ի գլխավոր քարտուղարի տեղակալ Տաթևիկ Ասատրյանը ներկայացրեց ՀՖՖ գործունեության (2024 դեկտեմբեր – 2025 դեկտեմբեր) հաշվետվությունը, իսկ ՀՖՖ Ֆինանսական տնօրեն Դավիթ Մկրտչյանը՝ ՀՖՖ նախորդ ֆինանսական տարվա (2024) ֆինանսական հաշվետվությունը: Երկուսն էլ հաստատվեցին ՀՖՖ հերթական 26-րդ ժողովի պատվիրակների կողմից:
«Բեյքեր Թիլլի Արմենիա» ՓԲԸ-ն ներկայացրեց անկախ աուդիտորական եզրակացությունը և համախմբված հաշվետվությունը։ ՀՖՖ Ժողովը հաստատեց այն: Այնուհետև ՀՖՖ Ֆինանսական տնօրեն Դավիթ Մկրտչյանը ներկայացրեց ՀՖՖ 2026 թվականի ֆինանսական տարվա բյուջեն: ՀՖՖ Ժողովի պատվիրակները քվեարկեցին բյուջեի հաստատման օգտին։
Հաջորդիվ ՀՖՖ փոխնախագահ Արմեն Նիկողոսյանը ներկայացրեց ՀՖՖ 2019-2026թթ. ռազմավարության զեկույցը։
Օրակարգի վերջում կատարվեց ՀՖՖ Գործադիր կոմիտեի նոր անդամի և ՀՖՖ Ընտրական կոմիտեի փոխնախագահի ընտրությունը: ՀՖՖ Գործադիր կոմիտեի նոր անդամ դարձավ Աննա Օհանյանը («Նոա ՖԱ» ՀԿ), իսկ ՀՖՖ Ընտրական կոմիտեի փոխնախագահի պաշտոնում ընտրվեց Վարդան Կոստանյանը, հաղորդում է ՀՖՖ մամուլի ծառայությունը։
