22.12.2025 | 23:06
Ինժեներական քաղաքի փառքի արահետում բացվել են Global High-Tech պետական մրցանակի երեք դափնեկիրների աստղերը
Փաշինյանը Պուտինի հետ խոսել է «Թրամփի երթուղու» կառուցման շուրջ ԱՄՆ-ի հետ բանակցությունների մասին
Քաղաքականություն
22.12.2025 | 19:54
Ռուսաստանի նախագահ Վլադիմիր Պուտինի հետ հանդիպման ժամանակ ՀՀ վարչապետ Նիկոլ Փաշինյանը հայտարարել է Երևանի և Վաշինգտոնի միջև կառուցողական բանակցությունների մասին «Թրամփի երթուղու» կառուցման վերաբերյալ, որը Հայաստանի տարածքով Ադրբեջանի հիմնական մասը կկապի Նախիջևանի հետ։
«Մենք այժմ շատ կառուցողական երկկողմ բանակցություններ ենք վարում Միացյալ Նահանգների հետ TRIPP ճանապարհի շինարարության մեկնարկի վերաբերյալ։ Սրանք իսկապես նշանակալի և իմաստալից փոփոխություններ են մեր տարածաշրջանում։ Եվ այստեղ կան բազմաթիվ նրբերանգներ՝ կապված Ռուսաստանի Դաշնության հետ մեր երկկողմ հարաբերությունների հետ։ Այսօր, կարծում եմ, շատ լավ հնարավորություն է՝ քննարկելու այս բոլոր հարցերը»,- ասել է Փաշինյանը։
Նա նաև նշել է, որ Երևանի ու Բաքվի միջև խաղաղության հաստատումը նոր հնարավորություններ կբացի հայ-ռուսական հարաբերությունների համար։
«Ինչպես մենք խոսել ենք օգոստոսի 8-ից հետո մեր հեռախոսազրույցի ժամանակ՝ ձեռք բերված խաղաղությունը նոր հնարավորություններ կբացի Հայաստանի և Ռուսաստանի միջև երկկողմ հարաբերությունների հետագա զարգացման համար»,- ասել է Փաշինյանը։
ՀՀ վարչապետը նաև շնորհակալություն է հայտնել Պուտինին խաղաղության գործընթացում ցուցաբերած աջակցության համար։
«Մեր տարածաշրջանում տեղի են ունենում շատ կարևոր և, բարեբախտաբար, դրական զարգացումներ։ Ես կցանկանայի շնորհակալություն հայտնել Ձեզ՝ Հայաստանի և Ադրբեջանի միջև խաղաղության գործընթացին ցուցաբերած աջակցության համար»,- նշել է Փաշինյանը։
Միաժամանակ, նա պատմական իրադարձություն է անվանել այն փաստը, որ Ռուսաստանից Ադրբեջանի միջոցով գնացքներ են սկսել ժամանել Հայաստան։ Փաշինյանի խոսքով՝ Հայաստանում մի քանի այլ երկաթուղային հատվածների վերականգնման օրակարգն արդեն հասունացել է, և մանրամասնել, որ դրանք այն երկաթուղիներն են, որոնք կապում են Հայաստանը Ադրբեջանի, Նախիջևանի և Թուրքիայի հետ։
«Բավականին ակտիվ քաղաքական գործընթաց է ընթանում։ Չեմ կարող ասել, որ դեռևս որևէ քաղաքական որոշում կա այս երկաթուղիները բացելու վերաբերյալ, բայց կարծում եմ, որ իրավիճակը հասել է այն կետին, երբ անհրաժեշտ է նախապատրաստական աշխատանքներ իրականացնել»,- հայտարարել է ՀՀ վարչապետը։
Թարգմանությունը՝ Էմմա Չոբանյանի
