Քաղաքականություն
22.12.2025 | 16:27
Թուրքիայի և Հայաստանի սահմանին գտնվող «Ալիջան» անցակետում ենթակառուցվածքների և լոգիստիկ կարողությունների ամրապնդման գնահատում է անցկացվել, հաղորդում են թուրքական լրատվամիջոցները։
Իգդիրի նահանգապետ Էրջան Թուրանը, միգրացիայի կառավարման վարչության պետ Հուսեյն Քյոքը, Ազգային պաշտպանության նախարարության լոգիստիկայի գլխավոր տնօրենի պաշտոնակատար, գեներալ-մայոր Ահմեթ Համդի Աթաչը և համապատասխան նախարարությունների պաշտոնյաներ այցելել են Ալիջանի սահմանային անցակետ: Պատվիրակությունը քննարկել է սահմանային շրջանում տեխնիկական ենթակառուցվածքային ծառայությունների բարելավման և առկա չափանիշների բարձրացման ջանքերը: Նրանք նաև պաշտոնյաներից տեղեկություններ են ստացել սահմանային անցակետում իրականացվող աշխատանքների մասին և գնահատականներ տվել ենթակառուցվածքների և լոգիստիկ կարողությունների ամրապնդման վերաբերյալ: Դաշտային ստուգումներից հետո տեղի է ունեցել գնահատման հանդիպում:
Հանդիպման ժամանակ ընդգծվել է, որ բացահայտված կարիքները և նախատեսված աշխատանքները պետք է իրականացվեն համակարգված:
Իգդիրի նահանգապետարանի սոցցանցերի էջերում արված գրառման մեջ նշվում է, որ սահմանային անցակետերում ծառայությունների որակի բարելավման ջանքերը կշարունակվեն։
Թարգմանությունը՝ Էմմա Չոբանյանի
