Կրեմլը մեկնաբանել է տեղեկությունները, որ Պուտինը ձգտում է Եվրոպայում նոր պատերազմների

Կրեմլում հայտարարել են, որ ԱՄՆ հետախուզության եզրակացությունները, որ Ռուսաստանի նախագահ Վլադիմիր Պուտինը ցանկանում է գրավել ամբողջ Ուկրաինան և վերադարձնել այն տարածքները, որոնք նախկինում ԽՍՀՄ մաս էին կազմում, չեն համապատասխանում իրականությանը, գրում է BBC-ի ռուսական ծառայությունը։

Անցյալ շաբաթ Reuters-ը, հղում անելով ԱՄՆ հետախուզական համայնքի եզրակացություններին ծանոթ վեց աղբյուրների, հաղորդել էր, որ Պուտինը չի հրաժարվել Ուկրաինան գրավելու, ինչպես նաև Եվրոպայի այլ մասերը, որոնք մի ժամանակ Խորհրդային կայսրության մաս էին կազմում, այդ թվում՝ ՆԱՏՕ-ի ներկայիս անդամ երկրները, նվաճելու իր նպատակից: Գործակալության աղբյուրների համաձայն՝ եվրոպացի առաջնորդներն ու հետախուզական գործակալությունները նույնպես կարծում են, որ Պուտինը պատերազմի է ձգտում Եվրոպայում:

Կրեմլի խոսնակ Դմիտրի Պեսկովը լրագրողներին ասել է, որ Մոսկվան չգիտի, թե որքանով են հուսալի Reuters-ի կողմից մեջբերված աղբյուրները, բայց եթե տեղեկատվությունը ճիշտ է, ապա ԱՄՆ հետախուզության եզրակացությունները սխալ են։

«Նախևառաջ, մենք չգիտենք, թե որքանով են նրանք [աղբյուրները] հուսալի։ Մենք իսկապես տեսել ենք որոշ ցրված հաղորդագրություններ այս հարցի վերաբերյալ, բայց նույնիսկ եթե դրանք համապատասխանում են իրականությանը, դա այն դեպքն է, երբ հետախուզական գործակալությունները սխալ դատողություններ, հետազոտություններ և եզրակացություններ են անում։ Սա բացարձակապես չի համապատասխանում իրականությանը»,- ասել է Պեսկովը՝ ի պատասխան Reuters-ի հաղորդագրության վերաբերյալ մեկնաբանության խնդրանքի։