29.06.2026 | 23:29
Ալեն Սիմոնյանը պարգևատրել է պետական պահպանության ծառայության աշխատողներին
500 մլն դրամի պայմանագրեր՝ խմբակցության անդամին․ Չարենցավանի ղեկավարը տուգանվել է
Քաղաքականություն
22.12.2025 | 14:37
Չարենցավան համայնքի ղեկավար Հակոբ Շահգալդյանին Կոռուպցիայի կանխարգելման հանձնաժողովը 300 հազար դրամի չափով տուգանել է։ Շահգալդյանը գնման 3 պայմանագիր է կնքել «Աշկար» ընկերության հետ, որի գործադիր մարմնի ղեկավարը և միակ սեփականատերը իր հետ գործնական հարաբերություններ ունեցող, նույն համայնքի ավագանու նույն խմբակցության անդամ Տարոն Եփրեմյանն է։
Պայմանագրերը կնքելուց առաջ Շահգալդյանը հանձնաժողովին չի ներկայացրել դրանց կնքման մասին հայտարարությունը՝ այդ կերպ խախտելով օրենքը:
«Չնայած այն հանգամանքին, որ Կոռուպցիայի կանխարգելման հանձնաժողովին շահերի առկայության վերաբերյալ հայտարարություն չի ներկայացվել, հավաստիացնում եմ, որ իմ և համայնքապետարանի որևէ պաշտոնատար անձի, պատասխանատու ստորաբաժանման անդամների, գնահատող հանձնաժողովի անդամների, գնումները համակարգողի կողմից կատարվող գործողությունների արդյունքում չի ստեղծվել շահերի բախման այնպիսի իրավիճակ, որը կարող էր ազդել կամ ազդել է վերջիններիս պաշտոնական պարտականությունների անաչառ և օբյեկտիվ կատարման վրա»,- իր բացատրությունում գրել է Չարենցավան համայնքի ղեկավարը։
Ընդհանուր շուրջ 500 միլիոն դրամի պայմանագրեր են կնքվել Հակոբ Շահգալդյանի և «Աշկար» ընկերության միջև։
«․․․Հանձնաժողովը եզրահանգում է, որ Հակոբ Շահգալդյանի կողմից իր պաշտոնեական պարտականությունների անաչառ և օբյեկտիվ կատարումն ապահովելու նպատակով չեն ձեռնարկվել օրենքով սահմանված համապատասխան գործողություններ՝ շահերի բախման իրավիճակում չհայտնվելու կամ նման իրավիճակում հայտնվելու պարագայում օրենքով նախատեսված՝ կանխարգելման ընթացակարգերով առաջնորդվելու ուղղությամբ»,- նշել է հանձնաժողովը։
Նշենք՝ Հակոբ Շահգալդյանը և Տարոն Եփրեմյանը «Միասնական համայնք դաշինք» խմբակցությունից են։ Հակոբ Շահգալդյանը Կոտայքի նախկին մարզպետ Կավալենկո Շահգալդյանի որդին է:
Եվգենյա Համբարձումյան
