01.02.2026 | 20:00
Մեղրիի լեռնանցքում սաստիկ բուք է
Դատարանը ՊՍԺ-ին պարտավորեցրել է 61 միլիոն եվրո վճարել Մբապեին
17.12.2025 | 12:54
Փարիզի դատարանը մերժել է Ֆրանսիայի չեմպիոն ու Չեմպիոնների լիգայի գավաթակիր ՊՍԺ-ին դիմումը և պարտավորեցրել 61 միլիոն եվրո վճարել Մադրիդի «Ռեալի» ֆրանսիացի հարձակվող Կիլիան Մբապեին, հաղորդում է RMC Sport-ը։
2017-2024թթ․ ՊՍժ-ում խաղացած 26-ամյա ֆուտբոլիստը պնդում էր, որ ակումբն իրեն չի վճարել աշխատավարձն ու բոնուսները պայմանագրի վերջին ամիսների համար։ Մբապեի ներկայացուցիչները նշել են, որ վճարումների պահումը իրավական հիմք չի ունեցել՝ անկախ ակումբի փորձերից դրանք կապել պայմանագրի երկարաձգման շուրջ բանակցությունների հետ։
ՊՍԺ-ն իր հերթին պահանջում էր ֆուտբոլիստից գանձել 440 միլիոն եվրոյի չափով փոխհատուցում՝ պնդելով, թե Մբապեի գործողությունները վնասել են ակումբի շահերին։ Դատարանը չի ընդունել այդ փաստարկները և փարիզյան ակումբի պահանջները ճանաչել է անհիմն։
ՊՍԺ-ն արձագանքել է դատարինի որոշմանը և հանդես եկել հայտարարությամբ։
«ՊՍԺ-ն ի գիտություն է ընդունում դատարանի որոշումը, որը կկատարի, բայց իրավունք վերապահելով բողոքարկել այն։ Ակումբը միշտ գործել է ազնիվ և կշարունակի այդպես։ ՊՍԺ-ն հաջողություն է մաղթում ֆուտբոլիստին»,- նշված է հաղորդագրությունում։
Հիշեցնենք, որ 2024թ․ ամռանը Մբապեն ազատ գործակալի կարգավիճակում էր տեղափոխվել «Ռեալ»։ Նա ՊՍժ-ի պատմության լավագույն ռմբարկուն է 256 գոլով:
